Қостанай облысының тұрғындары бірыңғай UTC+5 уақыт белдеуіне көшуді қолдайтынын білдірді. Бұл ҚР Премьер-Министрі Олжас Бектеновтің өңірге жұмыс сапары барысында белгілі болды.
Хабарланғандай, жергілікті тұрғындардың айтуынша, бірыңғай уақыт белдеуіне көшу мәселесі олар бұрын да көтерген, себебі бұрынғы уақыт режимі табиғи биоритмдерге сәйкес келмеген.
Премьер-Министр көшу туралы шешім, оның ішінде 2017 жылы адамның циркадтық ырғақтарын зерттегені үшін Нобель сыйлығына ие болған американ ғалымдарының жұмысына негізделген елеулі ғылыми зерттеулерге сүйенгенін атап өтті.
«Адам үшін табиғи уақытқа сәйкес өмір сүру ең пайдалы екені ғылыми дәлелденген. Дәл осы себепті әлемнің озық елдері табиғи уақыт белдеуіне көшуге ұмтылады», – деп атап өтті Олжас Бектенов.
Ол бұрын Қазақстанның директивті түрде ел үшін табиғи болып табылмайтын UTC+6 белдеуіне ауыстырылғанын еске салды.
Үкімет басшысы жаңа уақытқа бейімделу уақытша ыңғайсыздықты тудыруы мүмкін екенін мойындады, алайда өңірлерге жұмыс кестелерін өз бетінше түзетуге мүмкіндік беретін қолданыстағы еңбек заңнамасының икемділігін атап өтті.
«Егер өңірлерде қандай да бір қолайсыздықтар болса, инфрақұрылыммен, жарықтандырумен, икемді кестені ұйымдастырумен жұмыс істеу керек. Осы мәселелердің барлығын одан әрі шешетін боламыз», – деп сендірді Премьер-Министр.
Жұмыс сапары барысында Премьер-Министр сондай-ақ өңірдегі бірқатар өнеркәсіптік кәсіпорындарға барып, онда жұмысшылармен әлеуметтік-экономикалық даму перспективаларын, кадрлық әлеуетті арттыру мәселелерін және Жұмысшы мамандықтары жылы қарсаңында инфрақұрылымдық міндеттерді шешуді талқылады.
Еске салайық, 2023 жылдың күзінде пленарлық отырыс кезінде Мәжіліс депутаты Еркін Әбіл Қазақстанды бірыңғай уақыт белдеуіне көшіруді ұсынды. 19 қаңтарда Үкімет қаулысына өзгерістер енгізіліп, оған сәйкес 1 наурыздан бастап ел аумағында бірыңғай UTC +5 уақыт белдеуі қолданыла бастады.
Кейінірек кейбір қазақстандықтар бұрынғы уақытты қайтаруды жақтап, ал Қазақстандағы бірыңғай уақыт белдеуін жою туралы петиция 50 мың қол жинады. Қол жинаудың себептерінің бірі азаматтардың қысқы кезеңде электр энергиясына шығындардың артуы мүмкіндігіне алаңдаушылығы болды.
Қыркүйек басында Сауда және интеграция министрі Арман Шаққалиев ұзақтығы 3 жылға созылуы мүмкін зерттеулерден кейін ғана билік уақытты ауыстыру нұсқаларын қарастыра алатынын мәлімдеді.