Петропавл тұрғындары жылу мен электр энергиясына шамадан тыс жоғары төлемдердің келіп түскеніне шағымдануда. Олардың айтуынша, өңірдегі коммуналдық қызметтердің бағасы 20%-ға қымбаттаған.
Astana.kz мәліметінше, қала тұрғындары жылумен жабдықтау қызметтеріне есептелген төлем құжаттарын өткен аптада алған. Олар жылу энергиясының жоғары бағасынан бөлек, электр энергиясының тарифі де өскенін айтады.
«Электр энергиясы, әрине, қымбаттады. Мен қыста 18 мың төлесемін, қазір 22 мың төлеп жүрмін. Менің үш бөлмелі пәтерім бар», - деді жергілікті тұрғын.
Өз кезегінде СҚО табиғи монополияларды реттеу жөніндегі комитеті департаментінің басшысы Дәмір Тоқтамысов электр энергиясына тарифтің соңғы рет ақпанда, ал жылуға қыркүйек айының соңында көтерілгенін айтты.
«Петропавлда тариф ағымдағы жылдың 23 қыркүйегінен бастап өзгертілді. Негізгі себептер – «Севказэнерго» АҚ-ның жылу энергиясын өндіру құнының өзгеруі, сондай-ақ «Петропавл жылу желілері» желілері арқылы жылу энергиясын тасымалдау құнының өзгеруі. Бұл компанияда өзгеріс ағымдағы жылдың 1 шілдесінен бастап болды. Тиісінше, «Севказэнергосбыт» үшін бұл уәкілетті органға жүгінуге негіз болып табылады, себебі Табиғи монополиялар туралы заң табиғи монополия субъектілеріне стратегиялық тауарлардың құнын өзгерту туралы жылына бір рет уәкілетті органға жүгінуге мүмкіндік береді», - деді ол.
Ведомство төлемдері күмән тудыратын тұтынушылардың монополистке жүгініп, есептелген төлемдерді түсіндіруді талап ете алатынын атап өтті.
«Келіспеген немесе бас тартылған жағдайда, монополияға қарсы департаментке арызбен жүгіну қажет», - делінген хабарламада.
Еске сала кетейік, бұған дейін хабарланғандай, маусым айының қорытындысы бойынша Қазақстанда электр энергиясы бір айда 0,2%-ға және бір жылда 31,7%-ға қымбаттаған. Айлық қымбаттауға БҚО «кінәлі» болды, мұнда тарифтер 7,9%-ға өскен, ал басқа өңірлерде олар алдыңғы айдың деңгейінде қалған.