Білім саласын дамытуға бөлінген бюджет қаражатының тиімді пайдаланылуын тексеру қорытындысы бойынша бірқатар лауазымды тұлғалар тәртіптік жауапкершілікке тартылды.
Жоғары аудиторлық палата (ЖАП) баспасөз қызметінің мәліметінше, ақпан айында жүргізілген аудит оқу-ағарту министрлігінің, ведомстволық бағыныстағы ұйымдардың және еліміздегі бірқатар жетекші жоғары оқу орындарының жұмысында жүйелік бұзушылықтарды анықтады.
Аудиторлар педагогтарды даярлау және жұмысқа орналастыру, оқу процесін әдіснамалық қамтамасыз ету, сондай-ақ мемлекеттік реттеу мәселелерінде кемшіліктерді анықтады.
Осыған байланысты ЖАП уәкілетті органдарға заңнаманы бұзған лауазымды тұлғаларды тәртіптік жауапкершілікке тарту мәселесін қарауды тапсырды.
Хабарланғандай, тәртіптік ықпал ету шаралары оқу-ағарту министрлігінің қызметкерлеріне, ғылыми орталықтардың басшылығына және ірі университеттердің өкілдеріне қолданылды. Тартылғандардың қатарында:
- ҚР ОМ Орта білім комитеті төрағасының орынбасары;
- ҚР ОМ Білім саласында сапаны қамтамасыз ету комитеті төрағасының орынбасары;
- Ш. Есенов атындағы Каспий технологиялар және инжиниринг университетінің ректоры;
- Қ.А. Ясауи атындағы Халықаралық қазақ-түрік университетінің ректоры;
- Ы. Алтынсарин атындағы Арқалық педагогикалық институтының проректоры;
- С. Аманжолов атындағы Шығыс Қазақстан университетінің проректоры;
- Л. Гумилев атындағы Еуразия ұлттық университетінің проректоры;
- М. Өтемісов атындағы Батыс Қазақстан университетінің проректоры;
- Қорқыт ата атындағы Қызылорда университетінің проректоры;
- Академик А. Қуатбеков атындағы Халықтар достығы университетінің проректоры;
- Ш. Мұртаза атындағы Халықаралық Тараз инновациялық институтының проректоры;
- М. Қозыбаев атындағы Солтүстік Қазақстан университетінің деканы;
- А. Мырзахметов атындағы Көкшетау университетінің кафедра меңгерушілері;
- Ы. Алтынсарин атындағы Ұлттық білім академиясының қаржы-экономика департаментінің директоры және бас ғылыми қызметкерлерінің бірі;
- М. Әуезов атындағы Оңтүстік Қазақстан университетінің мамандары.
Сондай-ақ «Дарын» республикалық ғылыми-практикалық орталығының бөлім басшылары мен әдіскерлері тәртіптік жауапкершілікке тартылды.