Әлеуметтік желілерде Батыс Қазақстан облысы Ақжайық ауданының әкімшілік орталығы Чапаев ауылының тұрғындары жаяу жүргіншілер жолының сапасыз салынғанына шағымданған видео тарады.
«Қазінформ» ХАА мәліметінше, Қайрат Майданов көшесінде мердігер ұйым түнгі уақытта қардың үстіне асфальт төсеген. Оның айтуынша, жабынның қалыңдығы бес сантиметрден аспайды.
«Бұл нағыз ұят. Көктемде мұның бәрі құлап кетеді. Чапаев ауылында барлық көшелерде де солай істеп жатыр — асфальтты тікелей қардың үстіне төсейді. Бұл дұрыс емес, ауыл тұрғындары қарсы. Әкімдік пен басқа да жауапты органдар қайда қарап отыр?» — деді ауыл тұрғыны.
Өз кезегінде Ақжайық ауданының әкімі Мұрат Сердалин Чапаев ауылдық округі әкімі аппараты өткізген ашық конкурс қорытындысы бойынша жаяу жүргіншілер жолдарын салу бойынша мердігер ретінде «Қазақстан ұйымдастырушыларының қоғамы» ҚБ танылғанын хабарлады.
Ұйым 2018 жылы тіркелген және Жамбыл облысы мен Шымкент аумағында жұмыс істейді.
Мердігер жұмысқа 11 қарашада кіріскен. Жаяу жүргіншілер жолдарының құрылысы Чапаев ауылындағы Мұхтар Әбдолов, Әйтеке би, Қайрат Майданов және Жұбан көшелерінде жүргізілген.
«19 желтоқсанда қолайсыз ауа райы жағдайларына байланысты жаяу жүргіншілер жолының құрылысы тоқтатылды. Орындалған жұмыстарды тапсырыс беруші қабылдаған жоқ. Сол күні Чапаев ауылдық округі әкімдігінің аппараты БҚО мамандандырылған ауданаралық экономикалық сотына «Қазақстан ұйымдастырушыларының қоғамы» ҚБ-ны мемлекеттік сатып алудың адал емес қатысушысы деп тану және одан 0,1% мөлшерінде тұрақсыздық айыппұл өндіріп алу туралы талап қою арызын берді», — деді Мұрат Сердалин.
Оның айтуынша, ауыл тұрғындары арасында түсіндіру жұмыстары жүргізілуде, ал жағдай аудандық билік органдарының бақылауында.