Маңғыстау облысының прокуратурасы автокөлік мектептерінің қызметін тексеріп, курстардан өту туралы анықтамаларды жалған берудің 1000-нан астам фактісін, сондай-ақ жүргізушілерді даярлау ережелерінің 100-ден астам бұзушылығын анықтады.
«Медициналық тексеруден өтпеген адамдарды оқуға жіберу, қорытынды сабақтарды, қорытынды аттестаттау мен емтихандарды өткізбеу, бекітілген оқу жоспарлары мен кестелерінің, сондай-ақ оқу көліктерінде қосымша тежегіш және ілінісу педальдарының болмауы фактілері анықталды», - деп хабарлады ведомствоның баспасөз қызметі.
Сонымен қатар автокөлік мектептерінің меншігінде көлік құралдары болмаған, бұл практикалық сабақтар өткізу мүмкіндігін жоққа шығарған.
Тексеру нәтижелері бойынша автокөлік мектептерінің басшылары әкімшілік жауапкершілікке тартылды, екі автокөлік мектебінің қызметі тоқтатылды.
Еске сала кетейік, өткен жылдың желтоқсанында Қаржылық мониторинг агенттігі (ҚМА) Өскемен арнайы ЦОН-ының бұрынғы басшысына қатысты қылмыстық істі аяқтады. Күдікті жүргізуші куәлігін алу үшін теориялық емтихан тапсыруға көмектескені үшін сыйақы алған. Бұл әрекеттерден түскен қылмыстық кіріс 32 млн теңгеден асқан.
Ағымдағы жылдың наурыз айында Жамбыл облысында Тараз арнайы ЦОН-ында жүргізуші куәліктерін заңсыз сатқан бір топ адам сотталды.
Мамыр айында соңғы үш жыл ішінде ҚМА аумақтық департаменттері 1,8 мыңнан астам автокөлік құралын бастапқы тіркеу жөніндегі алымды төлемей заңсыз тіркеуге байланысты 88 қылмыстық істі тергегені хабарланды, мемлекетке келтірілген залал 11,8 млрд теңгені құрады.