Маңғыстау облысының құқық қорғау органдары Бейнеу ауданы, Тұрыш ауылында ақбөкеннің ұшасы мен мүйіздерін заңсыз сақтау фактісін анықтады.
Polisia.kz мәліметінше, үйлердің бірінің ауласын тінту кезінде полицейлер 9 ақбөкен ұшасын, 30 мүйізді, оқ-дәрілерді және өзге де заттай дәлелдемелерді тауып, алып қойды.
Осы факті бойынша қылмыстық іс тіркелді. Алынған заттар сараптамаға жіберілді. Күдіктіге қатысты бұлтартпау шарасы ретінде жүргізілмеу туралы қолхат алынды.
Сонымен қатар Маңғыстау облысының Түпқараған ауданындағы «Ащымұрын» жағалау аймағында прокурорлар барлық каспий маңы елдері мораторий жариялаған бекіре тұқымдас балықтардың ірі партиясымен ұсталған ер адамды ұстады.
Өңір прокуратурасы баспасөз қызметінің мәліметінше, «Toyota Land Cruiser 100» көлігінің багажінен жалпы салмағы 455 кг балық табылды.
Іс ҚК-нің 339-бабы («Сирек кездесетін және жойылып кету қаупі төнген жануарлармен заңсыз айналысу») бойынша тергеу Түпқараған ауданы полиция бөліміне тапсырылды.
Еске сала кетейік, бұған дейін Батыс Қазақстан облысында Бәйтерек ауданының тұрғыны сотталған болатын, ол 291 ақбөкен мүйізін заңсыз сатып алып, сақтап және тасымалдаған. Мемлекетке келтірілген залал 429 079 500 теңгені құрады.
Ер адамға 7 жыл бас бостандығынан айыру жазасы тағайындалды, кейін мерзім бестен бір бөлікке қысқартылды. Сондай-ақ сотталушыдан мемлекет пайдасына 429 079 500 теңге көлеміндегі залал және 12 872 385 теңге мөлшеріндегі мемлекеттік баж өндірілді.