2021 жылы мемлекеттік бюджет есебінен салынған алматылық крематорий әлі күнге дейін пайдалануға берілген жоқ. Құны 1,5 млрд теңге болатын нысан денсаулық сақтау министрлігіне қажетсіз болып шықты.
Бұл туралы өзінің Instagram-парақшасында хабарлады Мәжіліс депутаты Сергей Пономарёв. Оның айтуынша, басты мәселе – баланс ұстаушының, яғни нысанды күтіп-ұстауға және оның жұмыс істеуін қамтамасыз етуге қабылдайтын ұйымның жоқтығы.
«Белгілі болғандай, денсаулық сақтау министрлігіне ол онша қажет емес, қазіргі уақытта Жерлеу қызметтері бюросымен келіссөздер жүргізілуде», — деп атап өтті депутат.
Хабарланғандай, крематорий чехиялық өндірістің экологиялық қауіпсіз екі газды пешімен жабдықталған. Нысан жұмысқа толығымен дайын — ғимаратқа коммуникациялар тартылған, жерлеу залдары жабдықталған.
Сергей Пономарёв мұндай нысан Алматы үшін, әсіресе халық санының өсуін ескере отырып, қажет екенін атап өтті.
«Мұндай крематорийдің қажеттілігі бар, өйткені биологиялық, медициналық қалдықтар өте көп. Күніне 16 мәйітті кремдеуге болады. Пандемия немесе эпидемия жағдайында мұндай нысан өте қажет, әсіресе Алматы агломерациясы 10-15 жылдан кейін 7,5 млн адамға жететінін ескерсек», - деп мәлімдеді ол.
Сондай-ақ депутат Алматыда 70 зират бар екенін, оның 61-і жабылғанын еске салды.
Еске сала кетейік, өткен жылдың наурыз айында Алматы әкімдігі осы крематорийді салған мердігер ұйымды сотқа берген еді. Хабарланғандай, жауапты компания жұмыстарды белгіленген мерзімде аяқтамаған.