Шығыс Қазақстан облысының Глубокое ауданында 10 жыл бұрын салынған аудандық аурухананың ғимаратында іргетасы шөгіп, қабырғалары жарыла бастады. Бұл туралы Facebook-тегі парақшасында хабарлады ШҚО-дағы «Әділдік жолы» РҚБ филиалының жетекшісі Әділ Пшенов.
Оның айтуынша, аурухананың ас блогының ғимараты мүлдем авариялық деп танылып, шамамен бір жыл бұрын жабылған. Медициналық мекеме қызметкерлерінің мәліметі бойынша, аурухананың акт залы да авариялық жағдайда тұр.
Сонымен қатар, қоғам белсендісі ғимараттың қасбеттік плиткасы барлық жерде түсіп қалғанын, желдету жүйесі жұмыс істемейтінін, ал аурухана маңындағы асфальт шөгіп, кей жерлерде мүлде жоқ екенін айтты. 
Белгілі болғандай, аурухананың құрылысы мемлекетке 2 млрд теңгеге түскен. Ғимаратты 2012 жылы «Құмаров и К» компаниясы сала бастаған, кейін компания басшылығы қылмыстық жауапкершілікке тартылған.
Мысалы, 2013 жылы аурухана құрылысы кезінде 321,8 млн теңге ұрлау фактісі бойынша қылмыстық істер қозғалған.
Содан кейін медициналық мекеменің құрылысын «Элхон» ЖШС жалғастырған, ол кезде оның басшысы белгілі бір Тумашинов Л.Ш. болған. Қоғам белсендісі бұл компания ауданның қазіргі әкімінің әкесіне тиесілі екенін мәлімдейді. Серіктестік бұл нысанды салып, 2014 жылдың тамызында пайдалануға берген.
Қорытындылай келе, Әділ Пшенов бірқатар сұрақтар қойды: «Неліктен «Элхон» ЖШС, техникалық қадағалау, авторлық қадағалау және тапсырыс беруші сапасыз жұмыс үшін әлі күнге дейін жауапкершілікке тартылмады? Неліктен 2016 жылдан бастап ШҚО денсаулық сақтау басқармасы ғимаратты күрделі жөндеуге қаржы бөлмеді? Неліктен ғимараттың авариялық жағдайына сараптама әлі жүргізілмеді?»
Сондай-ақ ол ШҚО әкімдігін аурухана ғимаратын күрделі жөндеуге қаржы бөлуге шақырды. Сонымен қатар, қоғам белсендісі Сыбайлас жемқорлыққа қарсы қызметтен және ШҚО прокуратурасынан аталған бұзушылықтарға назар аударып, тексеру жүргізуді сұрады.