Шымкентте ақшалай сыйақы үшін жүргізуші куәліктерін беруді қамтамасыз еткен ұйымдасқан қылмыстық топтың мүшелері ұсталды.
Қаржылық мониторинг агенттігінің (ҚМА) баспасөз қызметінің мәліметінше, мамандандырылған №2 халыққа қызмет көрсету орталығының (арнайы ХҚКО) басшысы Мұрашов Ж.Р. бастаған лауазымды тұлғалар «Азаматтарға арналған үкімет» КЕАҚ емтихан тапсыру рәсімдерін айналып өтіп, жүргізуші куәліктерін ресімдеу схемасын ұйымдастырған.
Осы «қызметтер» үшін олар 150 мыңнан 400 мың теңгеге дейін сыйақы алған. Нәтижесінде кемінде 500 адам заңсыз жүргізуші куәлігін алған.
200 млн теңгеден астам құны бар күдіктілердің мүлкіне тәркілеу мақсатында тыйым салынды. Тыйым салынған активтердің ішінде: 2 жеке үй, 2 пәтер, 2 жер телімі және 10 автокөлік бар.
Сот санкциясымен 12 күдіктіге қатысты күзетпен ұстау түріндегі бұлтартпау шарасы таңдалды. Сотқа дейінгі тергеу жалғасуда.
«Белгіленген рәсімдерді айналып өтіп, жүргізуші куәліктерін беру қоғамдық қауіпсіздікке нақты қауіп төндіреді. Мұның дәлелі Шымкент қаласындағы жол-көлік оқиғаларының жиілеуі: олардың саны 2022 жылы 398-ден 2024 жылы 878-ге дейін өсті», - деп қорытындылады ведомство.
Еске салайық, өткен жылдың сәуірінде Сыбайлас жемқорлыққа қарсы қызмет елдің арнайы ХҚКО-ларында автокөліктерді тіркеу және жүргізуші куәліктерін беру кезінде сыбайлас жемқорлық тәуекелдерін анықтады. Ведомство қызметкерлері дәйексіз деректерді енгізіп, жалған құжаттар берген.
Мамыр айында Астанада шетелден алымдар мен төлемдерді төлемей әкелінген автокөліктерді заңсыз тіркеумен айналысқан арнайы ХҚКО қызметкерлері, полиция қызметкерлері және азаматтар сотталды.
Кейінірек Алматы Сыбайлас жемқорлыққа қарсы қызметі «Азаматтарға арналған үкімет» мемлекеттік корпорациясы» КЕАҚ филиалының №1 мамандандырылған халыққа қызмет көрсету бөлімі басшысының орынбасарына қатысты сотқа дейінгі тергеуді бастады. Ол кәсіпкердің 930 мың теңгесін иемденуге күдікті.
Қазан айында Қарағанды облысында арнайы ХҚКО-ның бұрынғы басшысы және ХҚКО басшысының орынбасары ұсталды. Олар жүк авто көліктерін заңсыз тіркеді деген күдікке ілінген. Мемлекетке келтірілген залал 315 млн теңгеден асты.
Желтоқсанда ҚМА Өскемен арнайы ХҚКО-сының бұрынғы басшысына қатысты қылмыстық істі аяқтады. Күдікті жүргізуші куәлігін алу үшін теориялық емтихан тапсыру кезінде көмек көрсеткені үшін сыйақы алған. Бұл әрекеттерден түскен қылмыстық кіріс 32 млн теңгеден асқан.
Ағымдағы жылдың наурыз айында Жамбыл облысында Тараз арнайы ХҚКО-сында жүргізуші куәліктерін заңсыз сатқан бір топ адам сотталды.