Ресейлік «Лукойл» компаниясы «ҚазМұнайГаз» ҰК АҚ-на (ҚМГ) «Kalamkas-Khazar Operating» ЖШС-дегі (ККО) 50% үлесті сатып алғаны үшін $200 млн төледі. Серіктестік Каспий теңізіндегі «Әуезов», «Қаламқас-теңіз» және «Хазар» учаскелерінде көмірсутектерді өндірумен айналысады.
БАҚ деректері бойынша, сатып алу туралы ақпарат «ҚазМұнайГаздың» 2023 жылғы қаржылық есептілігінде жарияланған. Құжаттамаға сәйкес, мәміле өткен жылдың қыркүйек айында жабылған.
«ҚМГ Каспийдегі мұнай-газ кен орындарын игерумен айналысатын компанияға бақылауды жоғалтты. Жоба бойынша белгілі бір шарттар орындалған жағдайда 100 млн доллар көлемінде қосымша төлем де мүмкін», - делінген хабарламада.
Белгілі болғандай, ҚМГ-ның бұрынғы еншілес кәсіпорнында 93 млрд 258 млн теңгеге бағаланатын инвестициялар қалған. Сондай-ақ, үлестерді сату кезінде ККО компаниясы шығынды болғаны хабарланады.
Сонымен қатар, «Лукойлдың» Теңіз, Қарашығанақ және Құмкөл мұнай кен орындарын игеру жобаларында үлестері мен бірлескен кәсіпорындары бар.