Қазақстан мен ресейлік мемлекеттік корпорация «Росатом» республика аумағында бірінші атом электр станциясы (АЭС) жобасын іске асыру бойынша индикативтік жол картасын бекітті. Бұл туралы 20 маусымда ҚР Атом энергиясы жөніндегі агенттігінің баспасөз қызметі хабарлады.
Құжатқа агенттік басшысы Алмасадам Сәтқалиев және «Росатомның» бас директоры Алексей Лихачев қол қойды. Карта жобаның негізгі кезеңдерін қамтиды: инженерлік-іздестіру жұмыстары мен EPC-келісімшартын («кілтін тапсыру» форматы) жасасудан бастап жобалық құжаттаманы әзірлеуге дейін.
Қосымша тараптар «Қазақстандық атом электр станциялары» ЖШС мен «Росатомның» инжинирингтік бөлімшесі «Атомстройэкспорт» АҚ арасында негіздемелік келісімге қол қойды. Құжат Алматы облысының Жамбыл ауданында станция салу кезіндегі ынтымақтастықтың жалпы қағидаттарын айқындайды.
«Біз қазақстандық тараптың халықаралық консорциумды басқаруға көрсеткен сенімін жоғары бағалаймыз. Қазақстан — атом саласындағы біздің тарихи сенімді серіктесіміз», — деп пікір білдірді Алексей Лихачев, ресейлік технологиялардың сенімді және қауіпсіз екенін дәлелдегенін атап өтті.
Өз кезегінде, қазақстандық тарап та қол жеткізілген уағдаластықтарға қанағаттанғанын білдірді.
«Қазақстанда атом станциясын салу ел энергетикасының тұрақты дамуын қамтамасыз етудің кешенді стратегиясының бөлігі болып табылады. Біз қауіпсіздіктің жоғары деңгейін және өндірісті локализациялауды қамтамасыз ету үшін серіктестермен тығыз және ашық өзара іс-қимылға үміттенеміз», — деп Алмасадам Сәтқалиев оқиғаға түсініктеме берді.
Атом энергиясы жөніндегі агенттіктің басшысы сондай-ақ Қазақстанда екінші АЭС салуды, ең алдымен, қытайлық CNNC қатысуымен жүзеге асыратынын атап өтті.
Бұған дейін энергетика министрі мәлімдегендей, Қазақстанда ядролық кластерді қалыптастыру үшін кемінде үш АЭС салу жоспарлануда. Оның айтуынша, алаңдарды таңдау жалпы орналастыру схемасына және энергия желісінің конфигурациясына байланысты болады.