Павлодар облысында Ертіс – Успенка каналын қайта жаңартуды бес жыл бойы аяқтай алмай келеді. Оның ұзындығы 13 км құрайды. Бұл туралы облыс әкімі Асайн Байханов мәлімдеді.
«Қазинформ» ХАА деректеріне сәйкес, жұмыстар 2020 жылы басталған, алайда қазіргі уақытқа дейін жоспарланғанның тек 50% ғана аяқталған.
«Бұл жылдар бойы шешілмей келе жатқан мәселеге айналды, жергілікті масштабтағы LRT сияқты ұзаққа созылған құрылысқа айналуда. Канал 5 жыл бойы салынып жатыр. Осыған байланысты 10 мың гектар жер пайдаланылмай отыр. 10 мың сүтті сиыр ұстауға немесе 500 мыңға дейін түрлі дақылдар – картоп немесе сәбіз алуға болатын еді», - деді әкім.
Ертіс – Успенка каналының құрылысы кеңес заманында басталған, бірақ жұмыстар аяқталмағаны хабарланады. Каналды аяқтау туралы шешім қабылданған кезде, уәкілетті орган оны су жинағыш және сорғы станциясымен жабдықтауды тапсырған.
Алайда пандемия кезінде қаржыландыру мәселелері туындады. Соның салдарынан канал іске қосылмады. Енді жобаны биылғы жылдың қараша айында аяқтауға уәде берілуде.
«Қазіргі уақытта өңірдегі суармалы жерлердің ауданы 169,5 мың га құрайды. Оның ішінде нақты суарылатыны – 72 мың га. Осы бағытты одан әрі дамыту үшін суармалы учаскелерге инженерлік инфрақұрылым жүргізу бойынша жобалық-сметалық құжаттамасы бар 35 жоба әзірленді», - делінген хабарламада.
Сонымен қатар, облыс басшылығы Аққулы, Тереңкөл, Железин, Павлодар және Ертіс аудандарының әкімдеріне әрбір шаруашылықпен инженерлік коммуникациялар жүргізу бойынша іс-шараларды пысықтауды тапсырғаны белгілі болды.
Бұдан басқа, қалалар мен аудандардың әкімдері ауыл шаруашылығы басқармасымен және «Ертіс бассейндік инспекциясы» РММ-мен бірлесіп, пайдаланылмайтын суармалы жер учаскелеріне қатысты шаралар қабылдауы тиіс.
Айта кетейік, өткен жылы Павлодар облысының әкімі жобаны республикалық меншіктен алып, Ертіс-Успенка каналын жергілікті бюджет есебінен салып бітіруді ұсынған болатын.