«Ақ жол» партиясының төрағасы Азат Перуашев Асқар Садықовтың депутаттық мандатынан айырылуына себеп болған жағдайды атады.
Фракция жетекшісі өзінің Telegram-арнасында мәлімдегендей, Садықов партиядан қудалау (домогательство) үшін шығарылған.
«А.Садықовқа қатысты бірқатар өтініштер түсті, олар қаралып, пленумда расталды. Өтініштер оның әрекеттеріне, оның ішінде лауазымдық өкілеттіктерін асыра пайдалануға және этикалық нормаларды бұзуға байланысты болды. Әрбір айыптау бойынша жеке фактілерді келтіруге болады, бірақ бір мысал жеткілікті деп ойлаймын», - делінген хабарламада.
Перуашевтің айтуынша, Садықовтың қайталанатын қудалауына парламент қызметкері шағымданған. Дәлел ретінде ол WhatsApp-тағы хат алмасу скриншотын келтірген, оны Перуашев оның келісімімен желіде жариялаған. Алайда кейін қыздың өтініші бойынша хат алмасу суреті жойылған.«17 сәуірдегі қорлайтын ұсыныстарды ол елемей, еш жауап бермеген. Соған қарамастан, 15 мамырда ол дәл осындай әрекеттерді қайталаған, және мәлімдемеге қарағанда, мұндай қудалаулар А. Садықов тарапынан басқа күндері де үнемі жасалған», - делінген хабарламада.
«Ақ жол» жетекшісі қудалау құрбаны А. Садықовтың депутат ретіндегі қол сұғылмаушылығына байланысты құқықтық қорғауға жүгіне алмағанын айтты.
«Пленум барысында, анықталған заңсыз әрекеттерге жол берілмейтіні туралы ескертуіме А. Садықов өзінің депутат екенін және «кімге қаласа да, не қаласа да айтуға құқылы» екенін мәлімдеді. Сондықтан біз бұл «кедергіні» алып тастадық, ал А. Садықовты депутат мәртебесінен айыру туралы қабылданған шешім құрбанға өзінің абыройы мен қадір-қасиетін қорғауға мүмкіндік береді», - деп мәлімдеді Перуашев.
Қорытындылай келе, партия төрағасы Садықовтың лайықсыз мінез-құлқының басқа да мысалдары бар екенін, олар құқық қорғау органдарының назарын қажет етуі мүмкін екенін хабарлады.
«Көріп отырғандарыңыздай, жағдай өте лас, және маған бөтеннің хат алмасуын оқу да, оны жариялау да мүлдем ұнамады. Дегенмен, біздің үнсіздігімізді кейбіреулер, соның ішінде А. Садықовтың өзі де бұрмалап түсінді. Ол бір сұхбатында тіпті өзін 1937 жылғы қуғын-сүргіннің қаһарман құрбандарына «шындық үшін» зардап шеккен адам ретінде теңеді. Біз бұл қандай шындық екенін көрсетуге мәжбүр болдық, және сеніңіздер, басқа да эпизодтар мен құжаттар бар. Пленум нақты фактілерге сүйене отырып, А.Садықовты партиядан шығару туралы шешім қабылдады. Оның ішінде, бұл жағдайларды одан да қауіпті салдарға әкелмеу үшін», - деп қорытындылады Азат Перуашев.
Еске салайық, «Ақ жол» партиясының депутаты Асқар Садықов тамыз айының соңында мандатынан айырылды. Кейінірек партия төрағасы Азат Перуашев депутаттық мандаттан айыру және оны партиядан шығаруға негіз «А. Садықовтың депутат мәртебесіне жол берілмейтін әрекеттер жасауы» болғанын мәлімдеді.