Ғылым және жоғары білім министрі Саясат Нұрбек ғылыми жобаларды коммерцияландыру бойынша жұмыс нәтижелері және жасанды интеллект (ЖИ) саласындағы стартаптарды бизнес-жеделдету бағдарламасын іске қосу туралы айтты.
Үкіметтің баспасөз қызметінің мәліметінше, министрлік басшысы 2016 жылдан бастап Ғылыми қор ғылыми әзірлемелерді коммерцияландыруға бағытталған алты конкурс өткізгенін хабарлады.
«Маңыздысы, соңғы үш жылда коммерцияландыруға ні қаржыландыру, ні тең қаржыландыру бөлінбеді. Біз бұл жұмысты қайта жандандырып, коммерцияландыруға арналған гранттарды көбейттік. Жобалардың экономикаға қосқан жалпы үлесі 118,4 млрд теңгені құрады. Бірнеше мың жұмыс орны құрылды», — деді Саясат Нұрбек.
Сонымен қатар, Саясат Нұрбек Қазақстанда ЖИ қолдануға мүдделі стартаптарға бизнес-жеделдетуді қамтамасыз ететін «AI-Sana» бағдарламасы әзірленіп жатқанын хабарлады.
Бағдарлама әртүрлі салаларға бағытталғаны атап өтілді. Министрдің айтуынша, зияткерлік капиталдың негізгі көзі еліміздің жетекші жоғары оқу орындары болады.
«Биыл 650 мың студент жасанды интеллект бойынша арнайы курстардан өтеді, ал екінші кезеңде 100 мың студент Стэнфорд жоғары білім беру мектебінің бас техникалық директоры Пол Киммен бірлесіп дайындалған курстардан өтеді. Жыл соңына дейін жасанды интеллект саласында 1-1,5 мың стартап-команда құруды жоспарлап отырмыз», — деп атап өтті Саясат Нұрбек.