«Жетісу» футбол клубының бас бапкері Самат Смаков төрт матчқа дисквалификацияланды.
Cmn.kz мәліметінше, бақылау-тәртіптік комитет мұндай шешімді Смаковтың елдегі футбол шенеуніктеріне қатысты айтқан сөзіне байланысты қабылдаған.
«2025 жылғы Қазақстан Республикасы футбол чемпионатының бесінші турында «Ордабасы» — «Жетісу» командалары арасындағы матчтың ресми тұлғасына қатысты қорлау сөздерін қолданудан көрінген спорттық емес мінез-құлық үшін, Тәртіптік регламенттің 45-бабы 1-тармағының 1) тармақшасына сәйкес, «Жетісу» командасының бас бапкері Самат Смаковты төрт матчқа дисквалификациялау», – делінген Қазақстан футбол федерациясының мәлімдемесінде.
Кездесудің 87-минутында Самат Смаковтың қызыл қағаз алғаны хабарланды. Матч «Ордабасы» пайдасына 1:0 есебімен аяқталды.
Ойыннан кейін бапкер төрешілік ету мен Қазақстандағы кәсіби футболдың даму деңгейін сынға алды.
«13 адамға қарсы ойнау өте ауыр. Мен ешқашан төрешілер тақырыбын көтермеппін, бірақ бүгін таза заңсыздық болды. Мен бұл төрешінің бізді ойыннан төрт күн бұрын төрелетінін білгенмін. Мына мырза төрешілер департаментінің басшыларының бірі және ол өзін матчқа өзі тағайындайды. <…> Мен былай айтайын, сіздер батыруға жиналған адам емес. Мен бәрін айтамын. Мен үндемей қоймаймын», - деді Самат Смаков.