Қазақстанда бес күн ішінде полицейлер көші-қон заңнамасының 7 мыңнан астам бұзушылығын жолын кесті.
Polisia.kz деректері бойынша, 2,5 мыңнан астам шетелдік белгіленген болу мерзімдерін бұзған, 862 адам рұқсатсыз жұмыс істеген.
Сонымен қатар, 499 жұмыс беруші заңды айналып шетелдік жұмыс күшін тартқан, 3 мыңнан астам қабылдаушы тұлға өз үйінде тұратын шетел азаматтары туралы ішкі істер органдарын хабардар етпеген.
Барлық бұзушылар жауапкершілікке тартылды. Сонымен бірге 678 шетелдік елден шығарылып, Қазақстанға бес жылға кіруге тыйым салынды.
Бұдан басқа, полицейлер Мысыр азаматтарының заңсыз еңбек қызметі фактісін алғаш рет тіркеді. Қарағандыда ірі құрылыс алаңында рұқсатсыз жұмыс істеген осы елдің 14 азаматы табылды.
Сондай-ақ Алматы облысы Жамбыл ауданында көші-қон қызметі қызметкерлері рұқсат құжаттарынсыз қолдан жасалған алкоголь өндірумен айналысқан ҚХР-ның 12 азаматын анықтады.
Сонымен бірге Алматы облысында ХҚКО-ның үш қызметкері ұйымдастырған заңсыз көші-қон арнасы анықталды. Белгілі болғандай, олар еңбек мигранттарын заңдастыру үшін жалған құжаттар рәсімдеген. Құқық қорғаушылар ҚК-нің 394-бабы бойынша («Заңсыз көші-қонды ұйымдастыру») қылмыстық іс қозғады.
Еске сала кетейік, бұған дейін Жоғары аудиторлық палата (ЖАП) анықтаған еді, еңбек мигранттарының ресми табыстары мен шетелге аударылған қаражат арасында елеулі алшақтық бар. Хабарланғандай, үш орталықазиялық елдің азаматтары үш жыл ішінде Қазақстанда ресми түрде 136 млрд теңге тапқан, бірақ сонымен бірге өз елдеріне шамамен 1 трлн теңге аударған.