Атырау облысының барлық ауылдық округтері екі жыл ішінде заманауи спорттық инфрақұрылыммен қамтамасыз етіледі. Бұл туралы өңір әкімі Серік Шәпкенов бұқаралық спортты дамытуға арналған үкімет отырысында мәлімдеді.
Ағымдағы жылдың соңына қарай 68 ауылдық округтің 70% спорт нысандарымен қамтамасыз етіледі, ал ауқымды жобаларды жүзеге асыру халықтың спорттық инфрақұрылыммен қамтамасыз етілуін 62%-дан 70%-ға дейін арттыруға мүмкіндік береді деп жоспарлануда.
Әкімдіктің мәліметінше, өңірде 800 спорт нысаны жұмыс істейді. Олардың ішінде — 8 стадион, 53 спорт кешені және 702 спорт алаңы. Ірі заманауи нысандарға олимпиадалық 50 метрлік бассейн, «Атырау» спорт сарайы, теннис орталығы және мұз сарайы кіреді. Мемлекеттік нысандардан басқа, халыққа 17 жеке спорт нысаны қызмет көрсетеді.
Қазіргі уақытта облыста белсенді құрылыс жүргізілуде. 29 спорт кешенінің 7-і пайдалануға берілді, тағы 6-ы жыл соңына дейін аяқталады, ал қалған 16 нысанды келесі жылы тапсыру жоспарлануда. Сонымен қатар, Атырау қаласында және ауылдық аудандарда демеушілік қаражат есебінен 4 спорт нысаны салынуда. Олардың ішінде мамандандырылған волейбол және баскетбол орталықтары, сондай-ақ Мүкір және Кудряшов ауылдарындағы кешендер бар.
Дарынды спортшыларды даярлауға ерекше көңіл бөлінеді. Атырауда олимпиадалық резервтегі мектеп-интернатын салу жоспарлануда. Жоба мемлекеттік-жекешелік әріптестік форматында алты жыл мерзімге, оның ішінде 12 ай құрылыс және бес жыл техникалық пайдалануды қамти отырып, жүзеге асырылады. Кешен 13 спорт залын, бассейнді, оқу корпусын, жатақхананы, асхананы және кітапхананы қамтиды. Мұнда 12 олимпиадалық спорт түрі бойынша 400 спортшы оқып, жаттыға алады. Құрылыстың басталуы 2026 жылдың сәуіріне жоспарланған.
Бизнестің әлеуметтік жауапкершілігі аясында Texol компаниялар тобы ауданы 19 мың ш. м болатын спорттық-сауықтыру кешенінің құрылысын бастады, мұнда 12 спорт түрімен айналысуға жағдай жасалады.
Мемлекет басшысының Ұлттық құрылтайда айтылған тапсырмаларына сәйкес, Атырауда халықаралық деңгейдегі ірі спорттық жобаларды іске асыруға дайындық жүргізілуде. Олардың ішінде — Ұлттық ат спорты кешені (ипподром), 12 мың орындық EURO-IV санатындағы футбол стадионы және «Atyrau Arena» көпфункционалды спорт кешені. Бүгінгі күні жобалық жұмыстар аяқталды, мемлекеттік сараптамадан өту аяқталуда. Құрылысты келесі жылы бастау жоспарлануда.
Әкімдіктің деректері бойынша, Атырау облысы халқының дене шынықтырумен жүйелі түрде айналысу деңгейі 45,1% құрайды. Жыл соңына қарай көрсеткіштің 46%-ға дейін артуы күтілуде.