Көлік полициясы департаменті Астанадағы ескі вокзал ауданында 14 ақпанға қараған түні болған жарылыс туралы егжей-тегжейлі ақпарат берді.
Ведомствоның баспасөз қызметінің мәліметінше, пойызбен келген контейнердің жарылысы 00:25-те Астана станциясының сұрыптау паркінің 12-жолында болған.
Құрбандардың жоқ екені атап өтілді. Бір адам қолының жеңіл жарақатын алды. Полиция жолаушылар мен жақын маңдағы аудандар тұрғындарына ешқандай қауіп төніп тұрған жоқ деп сендірді.
«Осы факті бойынша көлік полициясы департаменті «Теміржол көлігінің қозғалыс қауіпсіздігі немесе пайдалану қағидаларын бұзу» бабы бойынша қылмыстық іс қозғады. Тергеу-жедел тобы құрылды. Қазіргі уақытта оқиғаның себептерін анықтау бойынша тергеу шаралары жүргізілуде», - делінген хабарламада.
«ҚТЖ» ҰК» АҚ баспасөз қызметі контейнер жеке компанияға тиесілі болғанын және онда электр жабдықтары (трансформаторлар, генераторлар) болғанын хабарлады.
Өз кезегінде әлеуметтік желілерде куәгерлер жарылыс толқынын маңайдағы аудандардың тұрғындары сезінгенін айтады. Кейбір үйлерде терезелер сынып кеткен.