Астана қалалық мәслихатының депутаты Владислав Сергеев Астанада ағаштар мен бұталарды отырғызуға бюджеттің ондаған миллиардтары жұмсалып жатқанын, бірақ олардың есебі жүргізілмейтінін мәлімдеді.
«Біз жыл сайын көгалдандыруға, жаңа ағаштар мен бұталарды отырғызуға орасан зор қаражат жұмсаймыз. Бюджеттің ондаған миллиарды осы мәселені шешуге кетеді. Бүгін біз бұл мәселеге жүйелі түрде келу үшін ережелерді бекітеміз», – деп атап өтті Владислав Сергеев.
Bes.media мәліметінше, ол сондай-ақ кесілген ағаштардың орнына отырғызылған ағаштардың көктеп кетпейтін жағдайларын еске салды.
«Бізге осы мінберден қоршаған ортаны қорғау және табиғат пайдалану басқармасының үш басшысы осы жүйені енгізуге уәде берді. Егер есеп жоқ болса, бюджет қаражаты тиімсіз пайдаланылып жатыр деген сөз. Осындай орасан зор қаражатты жұмсай отырып, біз қанша ағаш отырғызылғанын, қаншасы кесілгенін және өтемақы нақты қайда өткенін нақты түсінуіміз керек. Бізде өтемақы ретінде ағаш отырғызылып, бұл ағаштардың қурап қалған фактілері бар», – деп көрсетті депутат.
Елорда тұрғындары үшін қурап жатқан ағаш және бұта көшеттері әдеттегі көрініс екені атап өтілді.
«Қалада көгалдандыруға жауапты қызметтер жұмыс істейді: жерді қазады, жасыл желектер отырғызады. Бірақ оларды күтуде проблемалар туындайды», - делінген хабарламада.
Сонымен қатар депутат жасыл желектерді жол жиегінен көліктермен бүрку суды үнемдеу тұрғысынан да, жалпы ағаштарды суару кезінде де тиімсіз деп санайды.
Еске сала кетейік, бұған дейін журналист және ауылшаруашылық сарапшысы Кирилл Павлов хабарлағандай, елорда әкімдігі Астанадағы жасыл желектердің көктеп кету көрсеткіші туралы жалған статистика береді. Нәтижесінде бюджет миллиардтаған қаражаттан айырылады.
Сарапшы әкімдік көшеттердің көктеп кетуінің жоғары көрсеткішін – 90% деп мәлімдейтінін атап өтті. Отырғызу жоспарланған миллион көшеттің қаншалықты көктеп кететіні болжанғаны туралы сұраққа әкімдік дәл осындай жауап берген.