Алматы облысындағы қатты тұрмыстық қалдықтар полигоны үшінші күннен бері жанып жатыр. Төтенше жағдайлар министрлігі әртүрлі өңірлерден қосымша күштерді жұмылдырды. Алматы тұрғындары қаладағы күйік иісіне шағымдануда.
Tengrinews.kz деректері бойынша, 15 қыркүйекте Алматы – Талдықорған трассасымен өтіп бара жатқан куәгерлер қоқыс полигонындағы ірі өрт туралы хабарлаған.
Кейін Алматы облысы Төтенше жағдайлар департаменті орында жерді рекультивациялау, аумақты топырақпен жабу және өрт ошақтарын сөндіру жұмыстары жүргізіліп жатқанын нақтылады. ТЖМ өртті жою жұмыстары жалғасып жатқанын атап өтті.
«Өртті жоюға Алматы, Шымкент қалаларының, Жетісу, Абай, Қарағанды, Түркістан, Жамбыл облыстарының ТЖД күштері мен құралдары, Мартбек Мамраев атындағы 52859 және Қасым Қайсенов атындағы 68303 әскери бөлімдерінің әскери қызметшілері қосымша тартылды. Барлығы 200-ден астам жеке құрам және 90-нан астам техника жұмылдырылды», — деп хабарлады министрлікте.
Құтқарушылардың мәліметінше, сөндіру жұмыстары жоғары өрт жүктемесі мен ауыспалы желге байланысты қиындап тұр. Шіріндінің тереңдігі 10 метрге жетеді, желдің бағыты үнемі өзгеріп отырады.
«Өртті сөндіруге 11 оқпан және бір жылжымалы лафетті оқпан жұмылдырылды», — деп нақтылады ТЖМ.
ТЖМ-де атап өткендей, өртті жою жұмыстары тәулік бойы жүргізілуде.
«Күндіз-түні құтқарушылар өрт ошақтарын инертті материалдармен жауып, кейін топырақты тығыздау жұмыстарын жүргізеді. Бұл әдіс шірінді ошақтарына оттегінің келуін толығымен бөгеп, өрттің түпкілікті жойылуын қамтамасыз етуге мүмкіндік береді», - деп түсіндірді ведомствода.
Төтенше жағдайлар министрі генерал-майор Шыңғыс Ариновтың тапсырмасы бойынша орынға өртке қарсы қызмет комитетінің төрағасы Ерлан Төрегелдиев келді. Полигонда тәулік бойы жою жұмыстарын басқаратын жедел штаб құрылды.
Сонымен қатар, уақытша Алматыда орналасқан Алатау қаласы әкімінің аппараты қоқыс үйіндісіндегі өртке байланысты жергілікті деңгейдегі техногендік сипаттағы төтенше жағдай жариялау туралы шешім дайындады.
«Ашық НҚА» порталында орналастырылған құжат 17 қыркүйек сағат 12:00-ге дейін талқылау үшін қолжетімді.