Жетісу облысының Қаржылық мониторинг агенттігінің (ҚМА) департаменті Бактыбай ауылы, Ескелді ауданындағы Мәдениет үйін күрделі жөндеуге бөлінген бюджет қаражатын жымқыру фактісі бойынша сотқа дейінгі тергеп-тексеру жүргізуде.
ҚМА баспасөз қызметінің хабарлауынша, 2020 жылы аудандық ішкі саясат бөлімі мен мердігер ұйым нысанды күрделі жөндеуге 753 млн теңге сомасына келісімшарт жасасқан.
Келісімшарт шарттарына сәйкес мердігер жұмыстарды 2021 жылдың желтоқсанына дейін аяқтауға міндеттенген, алайда нысан осы уақытқа дейін пайдалануға берілмеген.
Тергеу іс-шаралары барысында уәкілетті органдар бұрын актілер негізінде қабылданып, төленген құрылыс жұмыстарының бір бөлігінің жоқтығын анықтады.
Алдын ала мәліметтер бойынша, мемлекетке келтірілген залал 212 млн теңгеден асқан.
Тергеу аясында іске қатысты адамдардың мүлкіне шектеу қойылды. Сотқа дейінгі тергеп-тексеру жалғасуда.
Еске сала кетейік, бұған дейін хабарланғандай, Жетісу облысының ҚМА департаменті тұрғын үйлерді салу кезінде бюджет қаражатын жымқыру фактісі бойынша тергеу жүргізуде. Залал 152 млн теңгеден асқан.