Абай облысы әкімінің бірінші орынбасары Шалқар Бәйбеков облыстық бюджет қаражатын пайдалану және активтерді басқару бойынша жүргізілген мемлекеттік аудиттің қорытындылары туралы айтып берді. Аудит 2022 жылғы 1 қаңтардан 2024 жылғы 30 сәуірге дейінгі кезеңді қамтыды.
Бәйбековтің хабарлауынша, аудит барысында 1,1 млрд теңге сомасында қаржылық бұзушылықтар анықталған, қаражатты тиімсіз жоспарлау мен пайдалану сомасы 143,3 млн теңгені құраған.
Тексеру комиссиясы қаржы, экономика және бюджеттік жоспарлау, ауыл шаруашылығы, жұмыспен қамтуды үйлестіру және әлеуметтік бағдарламалар басқармаларының және басқа да салалардың қызметін тексергені хабарланады.
Негізгі қаржылық бұзушылықтар Шығыс Қазақстан облысының тиісті ведомстволары 2015-2018 жылдары жылумен және сумен жабдықтауға берген бюджеттік несиелерді есепке алу кезінде жіберілгені атап өтіледі. Абай облысы құрылғанға дейін ШҚО әкімдігінің балансына 711 млн теңге сомасындағы активтер қабылданбаған.
Квазимемлекеттік сектордың алты субъектісі 224 млн теңге сомасында бұзушылықтарға жол беріп, негізгі борышты және сыйақыны өтеу жөніндегі міндеттемелерін орындамаған.
Аудит барысында сондай-ақ 69 млн теңге мөлшеріндегі микронесиелік қарыздардың мақсатсыз пайдаланылғаны анықталды.
«Суару және дренаж жүйелерін жетілдіру» жобасы бойынша борыштарды негізсіз беру сомасы 146,9 млн теңгені құрады.
Сонымен қатар, жоба бойынша ШҚО-дан Абай облысына борышты беру кезінде бюджетті бөлу кезінде түпкілікті қарыз алушылар бойынша сомалардың нақтылануы болмағандықтан, міндеттемелерді негізсіз қабылдауға жол берілген.
Тексеру кезінде Абай облысының 2022-2023 жылдардағы жалпы борышы 69,7 млрд теңгені және $457,7 мыңды құрағаны, оның 16,1 млрд теңгесі және $50,9 мыңы бүгінгі күнге өтелгені хабарланады.
Бәйбековтің сендіруінше, мемлекеттік аудит қорытындысы бойынша лауазымды тұлғалар әкімшілік жауапкершілікке тартылған. Әкімдік өкілі сондай-ақ аудит бюджет қаражатын ұрлау, жетіспеушілік немесе бухгалтерлік есеп жүргізуден жалтару жағдайларын анықтамағанын атап өтті.