Атырауда «100 ауланы абаттандыру» жобасы аясында Антикор еріктілері 800 млн теңгеден астам сомаға бұзушылықтар анықтады.
Атырау облысы бойынша Антикордың мәліметінше, Алмагүл 1,3 шағын ауданындағы аулада 60 млн теңгеге орындалған жұмыстардың жалған актілеріне заңсыз қол қою фактісі анықталды. Мердігер ойын алаңын, спорт аймағын орнатып, асфальтты ауыстырып, жиектер қоюы тиіс еді.
«Алмагүл 27-33 шағын ауданында тамыз айында жиектас, брусчатка орнату, футбол алаңын салу, аула аумақтарын, тротуарлар мен алаңдарды асфальтбетонмен жабу, балалар және спорт алаңдарын, осы алаңдардың орам жабынын және футбол алаңының жасанды жабынын төлеу жүргізілді. Алайда, көріп отырғандарыңыздай, жұмыстар мүлде атқарылмаған, бірақ төлем жасалған. Алмагүл 7,8,9, 14,15,16 шағын аудандарында дәл осындай жағдай», - делінген хабарламада.
Сонымен қатар, тапсырыс беруші жобалау-сметалық құжаттаманы әзірлеу кезінде бір данасының бағасы 470 мың теңгені құрайтын мәрмәрдан жасалған орындықтарды, қоқыс жәшіктері мен жиектастарды көрсеткен. Алайда прокуратура бұл қоқыс жәшіктері мен орындықтарды бағасы шамамен 40-50 мың теңге болатын ұқсас бұйымдарға, яғни көрсетілгеннен 10 есе арзан бағаға ауыстыру туралы ұсыныс жіберген.
«Үнемделген қаражат Атырау қаласындағы тұрғын үй кезегінде тұрғандарды <...> баспанамен қамтамасыз етуге, үш ауысымды мектептер санын (10) көбейтуге, аз қамтылған тұрғындарға көмек көрсетуге немесе жәрдемақыны азайтуға (шамамен 4 500) мүмкіндік берер еді. Алайда әкімдік көрсетілген қаражатты үнемдеудің орнына темірден жасалған 107 орындық сатып алып, олардың барлығын Аманшина 72,74 мекенжайындағы бір жерге орнатты», - делінген хабарламада.
Сондай-ақ, осы аулаларда еріктілер орындықтары жоқ карусель мен әткеншектерді және құмы жоқ құмсалғыштарды тапқан.