Қарағанды облысы бойынша тексеру комиссиясы жергілікті атқарушы органдардың (ЖАО) және квазимемлекеттік сектордың кейбір субъектілерінің қарызын басқару тиімділігіне аудит жүргізді.
Жоғары аудит палатасының (ЖАП) баспасөз қызметінің мәліметінше, тексеру іс-шаралары облыстық қаржы басқармасын, экономика басқармасын, энергетика және ТКШ басқармасын, «Қарағанды Су» ЖШС, «Теплотранзит Караганда» ЖШС, «Тұрғын үй қорын жаңғырту орталығы» ЖШС, «Шахтер» футбол клубы» АҚ және Қарағанды қаласының ТКШ, жолаушылар көлігі және автомобиль жолдары бөлімін қамтыды.
Аудиторлар соңғы 5 жылда жергілікті атқарушы органдардың қарызы 2,2 есеге, ал оған қызмет көрсету шығындары 1,5 есеге өскенін анықтады.
«Атап айтқанда, коронавирус пандемиясы кезінде мемлекеттік бағалы қағаздардың ауқымды шығарылымы және 2020 жылға арналған ЖАО қарыз лимитінің 3,8 млрд теңгеге сақталмауы орын алды. Сонымен қатар, бүгінгі таңда жалпы қарыз жүктемесі басқарылатын деп бағалануда», - делінген хабарламада.
2031 жылы ЖАО 20 келісімшарт бойынша 21,7 млрд теңге көлеміндегі берешекті жабуы тиіс екендігі атап өтіледі. Жалпы, 2024 жылғы 1 қаңтардағы негізгі қарыздың жалпы сомасынан 60,4% 2030 жылдан 2043 жылға дейінгі кезеңде өтелуге тиіс.
Аудиторлар сондай-ақ «Теплотранзит Караганда» ЖШС шығындарының ұлғаюы аясында кәсіпорынның несиелік келісімдер бойынша міндеттемелерін орындамау тәуекелі артып жатқанын атап өтті.
Сондай-ақ «Қарағанды Су» ЖШС қатысушыларының үлесі пайдасына таза пайданы бөлу және банктік депозиттерді қатар толықтыру кезінде бюджеттік несиелерді тарту фактілері анықталды.
Сонымен қатар, тексеру комиссиясы «Шахтер» ФК АҚ қаржы ресурстарын тиімсіз басқаруды анықтады, бұл кредиторлық берешектің, оның ішінде жалақы, салықтар және басқа да міндетті төлемдер бойынша берешектің өсуіне әкелді.
Жалпы аудит қорытындысы бойынша анықталған бұзушылықтардың жалпы сомасы 5,3 млрд теңгеге жуықты құрады. Аудиторлар ЖАО-ға қажетті ұсынымдар жіберіп, бұзушылықтарды жою үшін нұсқамалар берді.
Еске сала кетейік, бұған дейін Алматы қаласының тексеру комиссиясы 2023 жылға арналған қалалық әкімдіктің мемлекеттік қарыздары мен міндеттемелерін басқаруға аудит жүргізген болатын, оның нәтижелері бойынша бюджет қаражатын жоспарлау, пайдалану және қайтару мәселелері анықталды.