Шу аудандық сотында балық шаруашылығы инспекциясының жергілікті тұрғынға жануарлар дүниесіне келтірілген материалдық залалды өтеу туралы талап арызы бойынша азаматтық іс қаралды.
Жамбыл облысы прокуратурасының баспасөз қызметінің мәліметінше, өткен жылдың қараша айында сот жауапкерді жалпы салмағы 313 кг болатын 5 түрлі балықты заңсыз сатып алу және тасымалдауда кінәлі деп таныған.
Заңсыз әрекеттердің нәтижесінде мемлекетке 2 млн теңгеден астам сомада залал келтірілді.
«Жауапкердің өкілі сот отырысында талапты мойындамады. Балық бір ғана азамат К.-ға тиесілі емес екенін және К. достарымен балық аулауға барғанымен, балық ауламай, оны «Д.» ЖШС-нен сатып алғанын түсіндірді», - делінген хабарламада.
Нәтижесінде сот жауапкер өкілінің дәлелдерін негізсіз деп танып, одан мемлекет пайдасына жануарлар дүниесіне келтірілген 2 млн теңгеден астам залал және 62 мың теңге мөлшерінде мемлекеттік баж өндірді.
Еске салайық, өткен жылдың қараша айында Абай облысында рұқсат құжаттары жоқ ірі партия балығы бар жүк көлігі ұсталған болатын. Қарау кезінде құқық қорғау органдары жалпы салмағы 7 340,3 кг балық салынған 408 қап және жалпы салмағы 959,7 кг балық филесі салынған 47 жәшік тапты.