Жамбыл облысында мердігер «Бақшалы 1» каналының сапасыз құйылған учаскесін бөлшектеуге міндеттелді. Бұл туралы ҚР Су ресурстары және ирригация министрлігі хабарлады.
Бұзушылықтарды вице-министр Ерболат Ибрайханов Шу ауданындағы Оң жағалаулық магистральдық каналдың реконструкциясын тексеру кезінде анықтады. Ақауларды жою туралы нұсқама берілгеннен кейін мердігер жұмыстарды қайта жасады.
Ерболат Ибрайханов мердігер ұйымға мұндай ақауларға жол берілмейтіні туралы нұсқаулар берілгенін атап өтті.
«Жұмыстар бекітілген жобаға және қолданыстағы құрылыс нормаларына сәйкес қатаң түрде орындалуы тиіс», — деді ол.
Тексерулер ПУИД-2 ирригациялық және дренаждық жүйелерін жақсарту бағдарламасы аясында өткізілуде. «Казводхоз» мамандары мен салалық департамент қалған учаскелерді аралауды жалғастыруда.