Оралда тұрғындар Кекілбаев пен Досмұхамедов көшелерінің қиылысындағы аудандағы жалғыз су бұрқағының маңындағы антисанитарлық жағдайларға шағымдануда.
«Мой Город» басылымының мәліметінше, қала тұрғыны Анна Еразумова су бұрқағының айналасына қоқыс жәшіктері қойылғанын, ыстық ауа райында олардан жағымсыз иіс тарап, қалдықтар ағып жатқанын айтқан. Бұл бұрқақты үйлеріне су жүргізуге мүмкіндігі жоқ ондаған отбасы пайдаланады.
«Ауа температурасы қырық градусқа жуық, шыбындар, инфекция, қоқыс шашылып жатыр — мұның бәрі адамдар су алатын бұрқақтың қасында. Инфекция жұқтыру қаупі алыс емес. Адамдар шошқа емес қой. <…> Ереже бойынша, су бұрқағынан қоқыс жәшігіне дейін кемінде 20 метр болуы керек. Қазір қоқыс су көзінен бір қадам қашықтықта тұр», — дейді Анна Еразумова.
Бұрын қоқыс алаңын жөндеу кезінде жәшіктер уақытша бұрқаққа ауыстырылған, бірақ жұмыс аяқталғаннан кейін оларды бұрынғы орнына қайтармаған. Тұрғындар уәкілетті органдарға жүгінген, алайда жағдай өзгермеген.
Қалалық тұрғын үй-коммуналдық шаруашылық (ТҮКШ) бөлімінде осы мекенжай бойынша жаңа пластик контейнерлер орнату жоспарланғанын түсіндірді. Оларға арналған алаң дайын, бірақ уақытша ескі темір жәшіктерді қою мүмкін емес екенін ведомство өкілдері айтты. ТҮКШ-те жәшіктерді ауыстыру мерзімін атай алмады.
Сонымен қатар, шенеуніктер контейнерлерді басқа жерге ауыстырса да, тұрғындар қоқысты бұрынғы орынға тастай береді деп есептейді.