Түркістан облысы Төлеби аудандық соты жергілікті блогерді полиция қызметкерлерінің заңды талаптарына бағынбағаны үшін айыппұл салды.
«Otyrar» Telegram-арнасының мәліметінше, оқиға 17 сәуірде Бірінші Мамыр ауылында болған. Полиция қызметкерлері Lada автокөлігін жол қозғалысы ережесін бұзғаны үшін тоқтатқан — жүргізуші қауіпсіздік белдігін тақпаған.
Осы сәтте блогер Facebook-те тікелей эфир бастап, полицейлердің заңды талаптарына бағынбаған, олардың қызметтік міндеттерін атқаруына кедергі келтірген және іс материалдарында көрсетілгендей, билік өкілдеріне құрметтемеушілік танытқан.
Нәтижесінде сот блогерді кінәлі деп танып, оған 30 АЕК (117 960 теңге) мөлшерінде айыппұл салды.
Оның кінәсі оқиға орнынан алынған бейнежазбалар мен куәгерлердің айғақтарымен дәлелденді. Сот шешімі заңды күшіне енген жоқ және оған шағымдануға болады.
Еске салайық, бұған дейін Алматыда «Дарикорн» бүркеншік атымен танымал блогер Дариға Нуркеева жол қозғалысы ережесін бұзғаны үшін әкімшілік жауапкершілікке тартылды. Қыз бағыт беру белгісін бермей, бағдаршамнан өтіп, авариялық жағдай туғызған. Ол болған оқиғаны видеоға түсіріп, әлеуметтік желілерге жариялаған.