Солтүстік Қазақстан облысында Петропавлдың қала маңындағы аудандарына су келуі жалғасуда. Қазіргі уақытта Заречный кентінен бөлек, су басу қаупі Тепличный кентіне де төніп тұр.
«Halyqstan» Telegram-арнасының мәліметінше, су бөгеттерді шайып, жолдарды басып, тұрғын үйлерге жақындап келеді. Бұл кенттерге адамдар вахталық автобустармен жеткізіліп жатыр, бірақ жақында бұл әдіс те қолжетімсіз болады деп атап өтілген.
Сонымен қатар СҚО әкімінің бірінші орынбасары тұратын Тепличный кентіндегі бөгеттің бұзылу қаупі туралы хабарлануда.
Жергілікті парақшаларда табиғи апатпен күресу үшін әртүрлі ведомстволардың шамамен 500 қызметкерінің жиналып жатқаны туралы ақпарат таралуда.
«Олар бөгетті нығайта ала ма - үлкен сұрақ. Өткен жылғы тәжірибеге сүйенсек, құм салынған қаптар ондай табиғи апатты ұстап тұра алмайды. Су тасуға шамамен 50 см қалды», - делінген хабарламада.
Белгілі болғандай, соңғы тәулік ішінде Петропавл су қоймасындағы су деңгейі 26 см-ге көтерілді. Құтқарушылардың айтуынша, көтерілу белсенді жүріп жатыр – сағатына 3-4 см.
Еске салайық, бұған дейін Петропавлда Есіл өзеніндегі су деңгейінің көтерілуіне байланысты Заречный кентіндегі және Өзен порты ауданындағы бақша учаскелерін су басқан еді. СҚО әкімі Ғауез Нұрмұхамбетов хабарлағандай, биыл облыста тасқын су үш толқынмен өтуде. Сонымен қатар Петропавлда тасқын судың ең жоғарғы деңгейі 28–30 сәуірде күтіледі.