Астана тұрғынының пара бергені үшін үкімі өзгертілді. Бастапқы айыппұл түріндегі жаза бас бостандығынан айырумен ауыстырылды.
Елорда прокуратурасы баспасөз қызметінің мәліметінше, сот үкімімен қала тұрғыны бірнеше рет пара бергені үшін 240,3 млн теңге көлемінде айыппұл төлеуге міндеттелді.
Кейін ол сот орындаушысына 196 млн теңге сомасындағы айыппұлдың ішінара өтелгені туралы түбіртектердің көшірмелерін ұсынды. Алайда құқық қорғау органдары ақшаның бюджетке түспегенін, ал түбіртектің жалған екенін анықтады.
«Аудан прокуратурасының нұсқауы бойынша сот орындаушысы айыппұлды бас бостандығынан айырумен ауыстыру туралы сотқа жүгінді, ол қанағаттандырылды», - делінген хабарламада.
Нәтижесінде сот сотталған адамға айыппұл түріндегі жазаны жеті жыл бас бостандығынан айырумен ауыстырды.
Жалған түбіртектерді ұсыну фактісі бойынша Астана прокурорлары тексеру жүргізуде.