Шамамен 150 адам Kunan Service ЖШС және Akadi Holding ЖШС құрамынан жалақыны көтеруді және компанияларды біріктіруді талап етеді.
Lada.kz мәліметінше, ереуілге шыққандар «Маңғыстаумұнайгаз» және «ҚазМұнайГаз» басшылығымен кездескенін, алайда келіссөздер еш нәтиже бермегенін айтты.
«Біз осы екі компанияның бірігуін, сондай-ақ жалақыны 50 пайызға көтеруді қалаймыз. Оның үстіне, бес кәсіби мерекеге 50 айлық есептік көрсеткіш мөлшерінде төлемдер жасалуын талап етеміз. Сондай-ақ зейнетақы төлемдерінің уақтылы жүргізілуін, демалыс ақысының толық көлемде берілуін талап етеміз», - деп мәлімдеді жұмысшылар.
Еске салайық, өткен жылдың желтоқсанында Маңғыстау облысының Жетібай ауылында «West Oil Software» компаниясының шамамен 500 жұмысшысы ереуілге шығып, «ҚазМұнайГаз» ұлттық компаниясына ауыстырылуды және жалақы мөлшерін ұлттық компанияның бірыңғай төлем жүйесіне сәйкес белгілеуді талап еткен болатын. Сонымен қатар, «West Oil Software» ЖШС-дегі орташа жалақы 700 мың теңгеден жоғары болғаны хабарланды. Сол күні жергілікті сот кәсіподақтардың қатысуынсыз жабық отырыста ереуілді заңсыз деп таныды.
Сол кездегі КМГ басшысы Мағзұм Мирзағалиев компанияның ереуілге шыққан жұмысшыларды штатқа қабылдай алмайтынын мәлімдеді, ал прокуратура ереуілге байланысты қылмыстық іс қозғалғанын хабарлады. Кейінірек ереуілге қатысқан 7 жұмысшы полицияда жауап алынды, және West Oil Software компаниясы оларды жұмыстан шығару туралы хабарлады.