Үкімет Көкшетау қаласы мен Ақмола облысының Макинск қаласы тұрғындарын сумен қамтамасыз ету үшін Арнайы мемлекеттік қордан 1 млрд теңге бөлуді шешті.
Ведомствоның баспасөз қызметінің мәліметінше, Көкшетауда су құбыры жүйесінің құрылысын аяқтауға 476,7 млн теңге бөлінді.
«Жобаны іске асыру халықты 100% орталықтандырылған сумен қамтамасыз етуге мүмкіндік береді. Бүгінгі күні шамамен 50 км құбыр тартылды. Жалпы желілердің ұзындығы 64,1 км құрайды», - делінген хабарламада.
Нысанды ағымдағы жылдың соңына дейін тапсыру жоспарлануда. Қолданыстағы инженерлік желі 30 мың тұрғынға есептелген. Қазіргі уақытта Көкшетауда 50 мыңнан астам адам тіркелген. Қаланың бас жоспарына сәйкес, 2038 жылға қарай тұрғындар саны 150 мың адамнан асуы мүмкін.
Макинскіде су құбыры желілерін реконструкциялауға 606,4 млн теңге бөлінді.
«Жоба 72,7 км желі тартуды көздейді. Бүгінгі күні бұрын бөлінген қаражат есебінен 45 км бойынша жұмыстар аяқталды», - делінген хабарламада.
Жалпы, қазіргі уақытта Арнайы мемлекеттік қордан білім беру, денсаулық сақтау, спорт, әлеуметтік қамсыздандыру салаларындағы, сондай-ақ коммуналдық инфрақұрылымды жаңғырту бойынша шамамен 280 жобаны іске асыруға қаражат бөлінді.
Еске сала кетейік, Қазақстанға активтерді заңсыз шығаруға қарсы күрес аясында қайтарылған қаражат Арнайы мемлекеттік қорға аударылады, одан мектептер, ауруханалар салу және инфрақұрылымды жаңғыртуды қоса алғанда, әлеуметтік қажеттіліктерге жұмсалады.
Қаңтар айында хабарланғандай, қайтарылған активтер есебінен Алматы облысы Кеген ауданының Жалағаш ауылында құны 1,1 млрд теңге болатын спорт кешенін салу жоспарлануда.
Ақпан айының басында үкімет қордан Ұлытау облысы Қаражал қаласында мектеп салуға 1,4 млрд теңгеден астам қаражат бөлді. Кейін Жетісу облысы Кербұлақ ауданының Көксай ауылында мектеп салуға тағы 1,4 млрд теңге бөлінгені белгілі болды.
Сондай-ақ, қордан Семейде Арнайы әлеуметтік қызметтер көрсету орталығын салуға 2,6 млрд теңге бөлінді. Қаржыландырылатын жобалар тізбесіне Астанадағы Қажымұқан Мұңайтпасов атындағы стадионның құрылысы енгізілді.
Наурыз айының басында үкімет Қызылорда облысы Арал ауданында сумен жабдықтау жүйелерін салуға және жаңғыртуға Арнайы мемлекеттік қордан шамамен 4,2 млрд теңге бағыттады.