«Майкаинзолото» кенішінде қаза тапқан құтқарушы Олег Тышкевичтің туыстарына моральдық зиян үшін өтемақы мөлшері азайтылды. Бұрын талап етілген 120 млн теңге орнына оның анасы, қарындасы, қызы мен ұлы 30 млн теңге алады.
Press.kz мәліметінше, Павлодар облыстық сотының азаматтық істер жөніндегі сот алқасы моральдық зиян сомасын әрқайсысына 7,5 млн теңгеге дейін төмендету туралы шешім қабылдады.
«Моральдық зиянның өтемақы мөлшерін анықтау кезінде бірінші сатыдағы сот еңбек қызметіне байланысты жазатайым оқиға туралы актіні, сондай-ақ жазатайым оқиға мән-жайларын арнайы тергеу актісін басшылыққа алды, олар жұмыс берушінің 100% кінәсін белгіледі. Сонымен қатар, сот жазатайым оқиғаның «Майкаинзолото» өндірістік қызметіне байланысты екенін ескермеді. Осы мән-жайларды сот моральдық зиянның өтемақы мөлшерін анықтау кезінде ескеруі тиіс», - деп қосты сотта.
Қаулы заңды күшіне енді.
Қыркүйек айында Екібастұз қалалық соты «Майкаинзолото» АҚ аумағында қаза тапқан тау-кен құтқарушысы Олег Тышкевичтің туыстарының пайдасына 120 млн теңге көлеміндегі талап арызды қанағаттандырғаны атап өтілді.
Еске салайық, 4 қаңтарда Майкаин кенішінің шахтасының жанында төрт тау-кен құтқарушысы бар автобус тазарту кеңістігінің 150 метрлік шұңқырына құлап кеткен болатын. Кейінірек екі мәйіт табылғаны туралы ақпарат пайда болды. Құтқарушы Айдос Шаймерденнің және жүргізуші Айып Тлеубергеновтің денелері жазда ғана табылды.
Сәуір айында ТЖМ, Павлодар облысы әкімдігі, «Майкаинзолото» АҚ, «Республикалық орталық кәсіби әскерилендірілген авариялық-құтқару қызметтерінің штабы» ЖШС және мемлекеттік еңбек инспекторы өкілдерінен тұратын комиссия жазатайым оқиға бойынша тергеу жүргізіп, нәтижесінде жұмыс берушінің жүз пайыз кінәлі екенін анықтады.
18 қыркүйекте белгілі болғандай, «Майкаинзолото» АҚ бас директоры Ботин, оның орынбасарлары Баширов мен Терешков, Майкаин жерасты кенішінің (МЖК) директоры Шувалов, МЖК директорының орынбасары Назыров, МЖК бас инженері Қайыпқанұлы және МЖК бас маркшейдері Тулеубеков ұсталды.
Сонымен қатар, наурыз айында «Майкаинзолото» АҚ өкілдері сотқа «Еңбек және халықты әлеуметтік қорғау министрлігінің Еңбек және әлеуметтік қорғау комитеті» РММ және «ТЖМ Өнеркәсіптік қауіпсіздік комитеті» ММ-не қарсы талап қойып, өздерін емес, автобус жүргізушісін кінәлі деп тануды талап еткені айтылды. Алайда сотта кәсіпорын талап арыздан ұтылып қалды.
Кейінірек белгілі болғандай, тау-кен құтқарушыларының қазасы туралы қылмыстық іс бойынша күдікті ретінде өтіп жатқан «Майкаинзолото» қызметкерлері сот залынан үй қамағына босатылды.