Қызылордада облыстық кәсіпкерлік және өнеркәсіп басқармасының басшысы Дінмұхамед Абсаттаров сотталды.
Антикор баспасөз қызметінің мәліметінше, ол кәсіпкерлерге ұлының оқу ақысын 1,4 млн теңге сомасында төлеу және құны 6,8 млн теңге болатын дизель отынын беру қажеттілігі туралы заңсыз нұсқаулар берген.
«Сонымен қатар, лауазымды тұлға өңір кәсіпорындарының тиісті сұйытылған газ көлемін алу құқығын шектеу арқылы заңды кәсіпкерлік қызметке кедергі келтіргені үшін сотталды, бұл бизнес субъектілеріне 26,9 млн теңге көлемінде залал келтірді», - делінген хабарламада.
Нәтижесінде сот Абсаттаровқа мемлекеттік қызметте және квазимемлекеттік секторда лауазымдарды атқару құқығынан өмір бойына айырумен қатар 9 ай бас бостандығынан айыру жазасын тағайындады.
«Сондай-ақ «Ерен еңбегі үшін» медалі – мемлекеттік наградадан айыру туралы ұсыну енгізілді. Үкім заңды күшіне енді», - делінген хабарламада.