Атырау облысында Қазақстанның экс-президентінің күйеу баласы - Тимур Күлібаевке тиесілі «Каспий мұнай» АҚ айыппұлға тартылды.
«2021-2022 жылдары кен орнын бұрғылау және пайдалану нәтижесінде пайда болған 4500 тоннадан астам қауіпті қалдықтарды жинақтау лимитін «Каспий мұнай» АҚ алмағаны анықталды», - деп хабарлады облыс прокуратурасының баспасөз қызметі.
Нәтижесінде Атырау облыстық сотының сот алқасы «Каспий мұнай» компаниясынан 13 684 868 730 теңге мөлшерінде айыппұл өндіруді ұйғарды.
Еске салайық, «Каспий мұнай» АҚ Атырау облысы Жылыой ауданындағы көп қабатты Айранкөл мұнай-газ кен орнын игерумен айналысады. Мұнай компаниясы акцияларының барлық пакетінің иесі Күлібаевқа да тиесілі «Joint Resources» АҚ болып табылады.
Бұған дейін белгілі болғандай, 2023 жылы Joint Resources 39,2 млрд теңге табыс тапты. Ал 2022 жылы компанияның шығыны 127,6 млрд теңгені құрады.
Сондай-ақ хабарланғандай, Күлібаевқа ішінара тиесілі «Joint Technologies» ЖШС жалпы сомасы 2 млрд теңге болатын екі айыппұлға тартылды.