Атырау облысы экология департаменты аймақтың мамандандырылған табиғат қорғау прокуратурасымен бірлесіп, «Кожан» АҚ-на тиесілі Жылыой ауданындағы «Морское» мұнай кен орнын тексерді.
««Морское» кен орнының № 56 ұңғымасында «Кожан» АҚ-ның табиғат қорғау заңнамасын сақтау жоспарын айқындау мақсатында сыртқы тексеру жүргізілді», - деп хабарлады департаменттің баспасөз қызметі.
Тексеру барысында ведомство қызметкерлері ұңғымада төтенше жағдай туындап, нәтижесінде ластаушы заттардың төгілуі орын алғанын анықтады – мұнаймен араласқан сұйықтық төгілді. Сонымен қатар, компания өкілдері оқиға туралы уәкілетті органдарға белгіленген мерзімде хабарламаған.
Тексеру қорытындысы бойынша, ластаушы заттарды рұқсатсыз шығарғаны үшін «Кожан» АҚ 393 200 теңгеге айыппұл салынды. Сонымен бірге, компанияға қатысты әкімшілік хаттама жасалып, материалдар Атырау облысының полиция департаментіне жіберілді.
Еске сала кетейік, бұған дейін Маңғыстау облысы прокуратурасы «Маңғыстаумұнайгаз» АҚ-на экологияға келтірілген зиян үшін 32 млрд теңге айыппұл салған болатын. Компания жер қойнауына ағынды суларды төгу және шектеулер белгілемей бұрғылау қалдықтарын жинақтау фактісі бойынша ұсталды.