Қостанай облысы бойынша Сыбайлас жемқорлыққа қарсы қызмет Бейімбет Майлин ауданы мәслихатының төрағасы мен депутатына қатысты сотқа дейінгі тергеуді аяқтады.
Ведомствоның баспасөз қызметінің мәліметінше, мәслихат төрағасы облыстық ішкі мемлекеттік аудит департаменті (ІМАД) қызметкерлеріне 2 млн теңге көлемінде пара берді деп айыпталуда. Депутат – делдалдықта.
Пара аффилирленген фирманың жергілікті мемлекеттік мекемелермен мемлекеттік сатып алу шарттарының талаптарын орындамауына байланысты бұзушылықтарды жасыру үшін берілгені атап өтілді. Іс сотқа жіберілді.
Еске сала кетейік, бұған дейін Ақтөбе облысының Сыбайлас жемқорлыққа қарсы қызметі Мұғалжар ауданы құрылыс бөлімінің басшысы мен аудандық мәслихат депутаттарына қатысты сотқа дейінгі тергеуді аяқтады. Олар әлеуметтік осал топтарға арналған тұрғын үй ретінде 70 пәтерлі жатақхананы сатып алу арқылы 672 млн теңге ұрланды деп күдіктелуде.