Түркістан облысында жергілікті «Қазсушар» филиалының Шардара және Мақтаарал өндірістік учаскелерінің басшылары жұмыстан уақытша шеттетілді. Бұған дейін оларға қатаң сөгіс жарияланған болатын.
Су ресурстары және ирригация министрлігінің баспасөз қызметінің мәліметінше, себеп аудандарда анықталған бұзушылықтар болған.
Атап айтқанда, Түркістан облысында күріш егу жоспары 3,3 есеге асып кеткен. Суғару суының тапшылығы қаупіне және 4000 га лимитіне қарамастан, жергілікті «Қазсушар» филиалы аграрийлермен 13 258 га күріш алқабын суғаруға 1047 келісімшарт жасасқан.
Сонымен қатар министрлік басшысы Нұржан Нұржігітов Шардара ауданындағы су шаруашылығы жағдайымен танысты.
Белгілі болғандай, бүгінгі күні Қызылқұм каналы күріш, жүгері, мақта, көкөніс, жоңышқа, жүзім, сондай-ақ бақша және бау-бақша дақылдары өсірілетін 28 366,1 га жерді суғаруды қамтамасыз еткен. Вегетациялық кезеңнің басынан бастап канал бойынша су беруге 2 978 келісімшартқа қол қойылған.
«Су кезекпен беріліп, аграрийлерге түнгі суғару және ауыспалы егіске көшу жөнінде түсіндіру жұмыстары жүргізілуде. Судың «қара» нарығын жою мәселесі өзекті болып отыр. Мәселен, Шардара су қоймасының маңында 24 заңсыз сорғы қондырғысы анықталды. Бұған дейін заңсыз су алумен күресті тиімдірек жүргізу үшін облыстың құқық қорғау органдарымен күш біріктірген болатынбыз», – деді Нұржігітов.
Сондай-ақ министр Шардара топтық су құбырының құрылыс барысымен танысты. Жобаны келесі жылы аяқтау жоспарлануда. Нысанның ұзындығы 39,28 км болады деп күтілуде.
«Жоба аясында I және II көтергіш сорғы станцияларын салу, сондай-ақ сегіз ұңғыма бұрғылау жоспарлануда. Тәулігіне 12 мың текше метр қуаттылықтағы су құбыры Шардара қаласының және оған жақын орналасқан 22 елді мекеннің тұрғындарын «Шардара-Байырқұм» жер асты көзінен сумен қамтамасыз ететін болады», - деп қорытындылады ведомствода.
Еске сала кетейік, бұған дейін ФБРК редакциясы «Қазсушар» РМК-ның ақмола филиалындағы қаржылық бұзушылықтар туралы материал жариялаған болатын. Сонда қаражатты күмәнді жұмсау, дизельді электр станциясы мен тралды ұрлау, сондай-ақ Ақылбай ауылында вахталық жұмысшыларға арналған жатақхананың салынбай қалуы туралы айтылған еді.
Жарияланымнан кейін редакцияға қайтадан өтініштер келе бастады — бұл жолы қымбат сорғылардың жоғалуы және жатақхана ғимаратының әлі де пайдалануға берілмеуі туралы. Су ресурстары және ирригация министрлігі ақпаратқа түсініктеме беріп, сорғы агрегаттары жоғалмағанын, керісінше жаңғырту аясында ауыстырылғанын түсіндірді.