Әлеуметтік медициналық сақтандыру қорының (ӘМСҚ) баспасөз қызметі биыл ведомство медициналық ұйымдарға медициналық көмек сатып алуды қаржыландыруда қиындықтарға тап болғанын хабарлады.
«Қаржыландырудың бастапқы тапшылығы және өтімділіктің қолданыстағы тапшылығы: тиісінше 116 млрд теңге және 571 млрд теңге. Денсаулық сақтау министрлігімен және жергілікті атқарушы органдармен бірлесіп, біз қаржылық тұрақтылық жоспарын бекітіп, қаражатты барынша үнемдеу шараларын қабылдадық. Бүгінгі күнге сыни тапшылық 70%-ға жабылды. Бірақ жыл соңына дейін қаражаттың жетіспеушілігі жағдайы түбегейлі жақсармайды», – деп ескертті Қордың басқарма төрағасы Әбілқайыр Сқақов.
Осылайша ӘМСҚ ерекше маңызды көмек түрлері бойынша берешек сомасын 116 млрд теңгеден 27 млрд теңгеге дейін төмендете алғаны хабарланады.
Еске сала кетейік, тамыз айында ӘМСҚ басшысы ведомствоның медициналық ұйымдар алдындағы берешегінің себебін айтқан болатын. Оның айтуынша, алдымен төлем жүйесі жұмыс істемеген, содан кейін кепілдік берілген медициналық көлемге ақшаны республикалық бюджет кешіктірген. Сонда Сқақов алдағы айларда қарыздар жабылатынына уәде берген еді.
Сонымен қатар шілде айында Жоғарғы аудит палатасында (ЖАП) ӘМСҚ-ның 2022-2023 жылдардағы тиімділігіне жүргізілген мемлекеттік аудит нәтижелері қаралды. Аудит 3,8 трлн теңге қаражат пен активтерді қамтып, 13 ұйымды қозғады.
Оның қорытындысы бойынша: 32 млрд теңгеден астам сомаға рәсімдік бұзушылықтар, сондай-ақ 31,1 млрд теңгеге қаражатты тиімсіз жоспарлау және пайдалану анықталды. Қаржылық шығындар мен жіберілген пайда сомасы 11,8 млн теңгені құрады.