Сот Парламент Мәжілісінің депутаты Дәулет Тұрлыхановтың ұлы - Болат Нұрасылға қатысты іс бойынша шешім шығарды, ол пробациялық бақылауды бұзғаны үшін айыпталды. Бұған дейін желіде Нұрасылдың бас бостандығын шектеу режимін бұзып, мейрамханада дастархан басында отырған видеосы тараған еді. 
Tengrinews.kz мәліметінше, материалдар сотқа Алматы қаласы бойынша қылмыстық-атқару жүйесі департаментінен (ҚАЖД) түскен. Ведомство өкілдері жазаны бас бостандығын шектеуден бас бостандығынан айыруға ауыстыруды сұраған.
Депутаттың ұлы бас бостандығын шектеу жазасын - 6 ай 12 күн өтегені, қалған мерзімі 1 жыл 5 ай 18 күн болғаны хабарланады.
«Сот пробация қызметінің Болат Нұрасыл Дәулетұлына қатысты бас бостандығын шектеу түріндегі жазаның өтелмеген мерзімін бас бостандығынан айыруға ауыстыру туралы ұсынысын қанағаттандыруды ұйғарды. Болаттың жазасын бас бостандығынан айыруға ауыстырсын», - делінген шешімде.
Нұрасыл Болат сот залында қамауға алынды. Ол жазасын орташа қауіпсіздік колониясында өтейтіні хабарланады.
Естеріңізге сала кетейік, мамыр айында Нұрасыл адвокат Олег Черновты және оның әйелі Аннаны ұрып-соққаны үшін екі жылға бас бостандығын шектеуге сотталған еді. Сонымен қатар, заңгерлерге шабуыл жасау кезінде депутаттың ұлы 32363 әскери бөлімінде болуы керек еді, онда әскери қызметін өтеп жүрген.