Қазақ ұлттық қыздар педагогикалық университетінде Қайрат Сатыбалды университетке берген Kaisar Tower бизнес-орталығын қалай пайдаланатынын айтты.
Bes.media мәліметінше, 2024 жылы жазда коммуналдық меншікке қайтарылған ғимаратта тақтайшаны ауыстырып үлгерген. Нысанның жалпы ауданы 12 мың ш. м. астам. Оқу орны қазірдің өзінде төрт қабатты алып отыр.
«Тоғыз қабатты ғимарат шынымен де оқу сабақтарын өткізуге бейімделмеген, біз қайта жөндеп жатырмыз. Онда 66 жалға алушы отырған, қазіргі уақытта ұзақ мерзімді келісімшарты бар бес ірі жалға алушы қалды. Біз олармен биылғы жылдың соңына дейін отыратыны туралы келістік. Онда аудиториялар мен зертханалар болады», – деді инфрақұрылымдық даму жөніндегі проректор Еркін Дүсіпов.
Ғимаратты жөндеуге және қайта жабдықтауға қанша ақша жұмсалатыны хабарланбады.
Белгілі болғандай, бизнес-орталық орналасқан мекенжайда тіркелген «Kaisar Tower» ЖШС 2014 жылы құрылған. Компания 2022 жылғы 7 ақпанда Қайрат Сатыбалды ұсталғанға дейін аз уақыт бұрын таратылған. Оған дейін бірінші басшы және құрылтайшы белгілі бір Бақытжан Құлбаев болған.
Құлбаев «Kaisar Tower» ЖШС, «Baidala V» ЖШС, «Баск» ЖК және «QS Holding» ЖШС директоры болғаны хабарланады.
2023 жылы депутат Мақсат Толықбай Сатыбалдының қамауда бола тұрып, «Baidala V» ЖШС компаниясымен Алматыдағы Hilton қонақ үйін сатып алу туралы келісімшарт жасасқанын айтқан еді.
Еске сала кетейік, өткен жылғы қыркүйекте Астана қаласы Байқоңыр ауданының №2 соты Қайрат Сатыбалдыға 6 жыл бас бостандығынан айыру жазасын тағайындаған болатын. Бұған дейін біз тұңғыш президенттің жиені бірнеше эпизодта айыпталып жатқаны туралы егжей-тегжейлі жазған едік – олардың барлығы мұнай-газ саласындағы тергеулерге қатысты.
Кейін Сатыбалды шартты түрде мерзімінен бұрын босату туралы өтініш берген, алайда ШҚО соты оны қабылдамады .
Сондай-ақ Қайрат Сатыбалдыға қатысты қылмыстық істер бойынша қайтарылған активтердің жалпы сомасы 732,8 млрд теңгені құрайтыны хабарланған еді.
Осы жылғы тамызда Өскемен қаласының №2 соты Сатыбалдының өтінішін қанағаттандырып, бас бостандығынан айыру түріндегі жазаның өтелмеген бөлігін 3 жыл 3 ай 7 күн мерзімге бас бостандығын шектеумен ауыстырды.
Сонымен қатар, Сатыбалдыға пробациялық бақылау белгіленді. Тұрақты жұмысы болмаған жағдайда, ол жазасын өтеудің барлық мерзімі ішінде жыл сайын 100 сағат мәжбүрлі еңбекке тартылуы мүмкін.