Су ресурстары және ирригация министрлігінде кеңес өтті, онда биыл төрт жаңа су қоймасын салу және төрт жұмыс істеп тұрған су қоймасын қайта жаңарту жоспарлары жарияланды.
Ведомствоның баспасөз қызметінің мәліметінше, қазіргі уақытта Түркістан облысында «Бәйдібек-ата» және «Қарақұйыс» су қоймаларының құрылысы жүргізілуде.
Сонымен қатар, жеке инвестициялар есебінен Жетісу облысында Покатилов су қоймасын салу жоспарланған. Өткен жылы Ақтөбе облысындағы су қоймасын қайта жаңарту аяқталды.
Осыдан бөлек, алты облыста 12 су қоймасын салу бойынша жобалау-сметалық құжаттама (ЖСҚ) әзірленуде. Биыл цифрландыру элементтерін қолдана отырып, 115 каналды қайта жаңарту және Астана су қоймасына қосымша су беруге арналған құрылысты салу басталады.
«Министрлік Қ. Сәтбаев атындағы каналдағы 19 сорғы агрегаты мен электр жабдықтарын ауыстыру бойынша жұмысты бастады. Бүгінгі таңда 17 трансформаторды жеткізуге келісімшарттар жасалып, 9 бірлік жинақтаушы жабдық сатып алынды. "Қазсушар" филиалдарының материалдық-техникалық базасын жақсарту үшін Үкіметтің қолдауымен 757 бірлік арнайы техника мен көлік сатып алу жұмыстары басталды. Бүгінде 150 бірлік арнайы техниканы "Қазсушар" филиалдары қабылдады, ал инвестициялық бағдарлама аясында қосымша 23 бірлік арнайы техника сатып алынды», - делінген хабарламада.
Жалпы, ағымдағы жылдың соңына дейін су ресурстары және ирригация министрлігі топтық су құбырларын салу бойынша 12 жобаны аяқтауды жоспарлап отыр. Бұл жалпы халқы 423 мың адам болатын 153 ауылды сапалы ауыз сумен қамтамасыз етеді деп күтілуде. Тағы 52 елді мекенді орталықтандырылған сумен жабдықтау жүйесіне қосу жоспарланған.