Жезқазғанда облыстық экология департаментінің басшысы Дастан Тілеубековке, оның орынбасары Әмірхан Тарғыновқа және екі жергілікті кәсіпкерге сыбайлас жемқорлық ісі бойынша үкім шығарылды.
Өңір соттарының баспасөз қызметінің мәліметінше, 2024 жылдың қазан айынан желтоқсан айына дейін Тілеубеков пен Тарғынов жалпы сомасы 5,2 млн теңге көлемінде пара алған.
Сонымен қатар, 2024 жылдың желтоқсаны мен 2025 жылдың қаңтары аралығында облыстың бас экологы жеке өзі пара ретінде тағы 2,5 млн теңге алған. Паракорлық кәсіпкерлердің мүддесі үшін заңсыз әрекеттер жасағаны үшін берілген.
Белгілі болғандай, «Р» ЖШС директоры департамент басшысы мен оның орынбасарына қоршаған орта сапасы көрсеткіштерінің жобаларын келісу үшін 1,7 млн теңге көлемінде пара берген.
Өз кезегінде «Э» ЖШС директоры оларға Сәтбаевтағы шекті рұқсат етілген шығарындылардың жиынтық томының жобасын келісу үшін 3,5 млн теңге көлемінде пара берген.
Үшінші эпизод бойынша, қылмыстық қудалау тоқтатылған азамат Дастан Тілеубековке экологиялық рұқсат беру үшін 2,5 млн теңге берген.
«Барлық сотталушылар сотқа дейінгі тергеу сатысында және сот тергеуі барысында өздеріне тағылған айыптар бойынша кінәларын толық мойындады, сонымен қатар олардың кінәсі ұсынылған дәлелдемелер жиынтығымен расталды», - делінген хабарламада.
Сот Дастан Тілеубеков пен Әмірхан Тарғыновты кінәлі деп тауып, әрқайсысына 6 жыл бас бостандығынан айыру жазасын тағайындады. Кәсіпкерлерге тиісінше 35 млн теңге және 70 млн теңге көлемінде айыппұл салынды.
«Барлық сотталғандарға мемлекеттік қызметте, судья, жергілікті өзін-өзі басқару органдарында, ҚР Ұлттық Банкінде және оның ведомстволарында, қаржы нарығын және қаржы ұйымдарын реттеу, бақылау және қадағалау жөніндегі уәкілетті органда, мемлекеттік ұйымдар мен квазимемлекеттік сектор субъектілерінде лауазымдарды атқаруға өмір бойына тыйым салу түріндегі қосымша жаза тағайындалды», - делінген хабарламада.
Еске сала кетейік, Тілеубековтің ұсталғаны туралы осы жылдың басында хабарланған болатын. Сонда ол экологиялық рұқсат беру үшін «Bass Gold» ЖШС өкілінен пара алуға күдіктелгені айтылған.