Атырау облысындағы ірі компания жер қойнауын тиімсіз пайдаланғаны үшін 600 млн теңгеден астам төлеуге міндеттелді.
Атырау облысы прокуратурасы баспасөз қызметінің мәліметінше, «ANACO» ЖШС 2018 жылдан 2023 жылға дейін 4 237 248 м3 көлемінде шикі газ жоғалтуға жол берген, бұл өз кезегінде ҚР «Жер қойнауы және жер қойнауын пайдалану туралы» Кодексінің 125-бабы 2-тармағы және 147-бабы 4-тармағы талаптарын өрескел бұзу болып табылады (өндіру көмірсутектердің жоғалуын болдырмайтын әдістермен және тәсілдермен жүргізілуі тиіс).
«Қадағалау актісін қарау нәтижелері бойынша Батыс өңіраралық мұнай-газ кешені мемлекеттік инспекциясы басқармасы 673 130 278 теңге мөлшерінде келтірілген залалды есептеді», - делінген хабарламада.
Компанияның ерікті түрде 285 млн теңгені төлегені хабарланады.
Еске салайық, бұған дейін Ақтөбе облысында мұнайды заңсыз өндіргені үшін «Сайгак Казахстан Б.В.» компаниясы филиалының бас директорының орынбасары сотталған болатын.