Департамент Қаржылық мониторинг агенттігінің (ҚМА) Алматы облысы бойынша департаменті азаматтарға пайызсыз несиеге жылжымайтын мүлік пен автокөлік сатып алуды ұсынған «Amanat Drive» қаржылық пирамидасын әшкереледі.
Ведомствоның баспасөз қызметінің мәліметінше, олар міндеттемелерін ішінара ғана орындаған — мүлік негізінен күдіктілердің туыстары мен жақын таныстарына берілген. Нәтижесінде пирамида 8 мыңнан астам салымшыны тартып, салынған қаражат сомасы 21 млрд теңгеден асқан.
Қылмыстық кірістерді заңдастыру үшін ұйымдастырушы бақылауындағы заңды тұлғалар — «Алло, не керек» ЖШС, «i-m@rketing» және «Gold SapaPremium» арқылы схеманы жүзеге асырған.
Бұл компаниялар жарнама қызметі, жылжымайтын мүлік және көлік нарығындағы аналитика мен болжау сияқты жалған қызмет көрсетушілер ретінде әрекет еткен. Жалған келісімшарттар негізінде күдіктілер 1,8 млрд теңгеден астам қаражатты шығарып, қолма-қол ақшаға айналдырған.
Қылмыстық кірістерге олар Астанадағы жеке үйлерді, пәтерлерді, сондай-ақ HUMMER H2 және Lexus LX570 қоса алғанда, қымбат автокөліктерді сатып алған. Тәркілеуден жасыру үшін мүлік сенімді тұлғаларға ресімделген.
Сот санкциясымен аталған мүлікке, сондай-ақ тұтыну кооперативінің шоттарына тыйым салынды. Пирамиданың бас ұйымдастырушысы қамауға алынды. Тергеу жалғасуда.
Еске сала кетейік, бұған дейін ҚМА-ның Қызылорда облысы бойынша департаменті салымшылары 28 млн теңгеден астам шығынға ұшыраған «HRT» қаржылық пирамидасының қызметін тоқтатқан болатын.