Алматы прокурорлары жеке сот орындаушыларының (ЖСО) 1000-нан астам борышкерге қатысты шара қолданбау фактілерін анықтады.
Ведомствоның баспасөз қызметінің мәліметінше, ЖСО борышкерлердің банктік шоттары мен мүлкіне тыйым салмаған, олардың жалақысынан берешекті ұстамаған, сондай-ақ елден тыс жерге шығуға шектеу қоймаған.
«Бұзушылықтар борышкерлердің сот актілерін орындаудан ұзақ уақыт бойы жалтаруына және бюджетке қаражаттың түспеуіне әкеп соқты, осылайша жазаның бұлтартпастығы принципі бұзылды», - делінген хабарламада.
Прокуратура актісі бойынша 50 ЖСО тәртіптік жауапкершілікке тартылды, біреуіне қатысты палатадан шығару рәсімі басталды.
Қабылданған шаралар нәтижесінде борышкерлерден 75 млн теңгеден астам өндірілді.
Еске салайық, мамыр айында Тараз прокурорлары жеке сот орындаушысының ақша қаражатын жымқырғанын анықтады. 46 борышкерден жиналған 3,1 млн теңгені ол өз шотына аударған.
Өткен жылдың қараша айында Қостанай облысының прокуратурасы өңірдің сот орындаушылары қайтыс болған борышкерлерге қатысты атқарушылық іс жүргізуді жаппағанын анықтады. Заң бойынша өндіріп алушы қайтыс болған жағдайда орындаушы бір жұмыс күні ішінде іс жүргізуді тоқтата тұруға міндетті болғанына қарамастан.