Соңғы үш жылда Алматы облысында мемлекет меншігіне 1135 жер телімі жалпы ауданы 367,8 мың га қайтарылды. Тек Қонаев қаласы бойынша бұл көрсеткіш 20,0 мың га-дан асты.
Өңір әкімдігі баспасөз қызметінің мәліметінше, жеке талдау нысаны жалпы ауданы 7 788,0 га болатын 82 жер телімі болды.
Оның 60 телімі жеке меншікте, 21-і жалдауда, біреуі тұрақты жер пайдалануда. Осы телімдердің ағымдағы жай-күйі:
- 36 телім мақсатты пайдаланылуда (құрылыстар бар, мал бары тіркелген);
- 22 телім бойынша материалдар жер ресурстарын басқару департаментіне (ЖРБД) жіберілді;
- тоғыз телім бойынша ЖРБД жұмыс жүргізуде;
- сегіз телім бойынша нұсқамалар берілді;
- төрт телім бойынша сотқа жіберу үшін материалдар дайындалуда;
- екі телім бойынша материалдар сотта;
- бір телім мемлекет меншігіне қайтарылды.
Жер телімдерінің негізгі бөлігі ҚР Су кодексі күшіне енгенге дейін, 2000-жылдары берілгені атап өтіледі. Ал Қонаев қаласында 2023 жылдан 2025 жылға дейін ЖРБД-ға ауданы 11,0 мың га болатын 115 телім бойынша материалдар жіберіліп, оның 50-іне нұсқамалар берілді.
«Аудандар мен қалалардың әкімдіктері 2023–2025 жылдар аралығында ЖРБД-ға жалпы ауданы 165,3 мың га болатын пайдаланылмайтын ауыл шаруашылығы және коммерциялық мақсаттағы 826 жер телімі бойынша материалдар жіберді. ЖРБД тексерулерінің нәтижесінде 541 жер телімі бойынша бұзушылық белгілері анықталды – олардың бірқатарына қатысты әкімшілік ықпал ету шаралары қабылданды», - деді әкімдікте.
Сонымен қатар, жерлерді қайтару жұмыстары ауыл шаруашылығы алқаптары бойынша да, инвестициялық әлеуеті бар телімдер бойынша да, оның ішінде Қапшағай су қоймасының жағалау аймағында да жүргізіліп жатқаны хабарланады.
Қорытындылай келе, әкімдікте қайтарылған жерлердің жалпы санынан ауданы 100,0 мың га болатын 942 телім қайтадан ауыл шаруашылығы айналымына енгізілгені атап өтілді.
Еске сала кетейік, бұған дейін Алматы әкімдігі мемлекеттік қажеттіліктер үшін жерлерді мәжбүрлеп иеліктен шығару туралы қаулыларды бекіткен еді. Шешім «Жайлы мектеп» пилоттық ұлттық жобасы және көлік инфрақұрылымын дамыту аясында қабылданды.