Ақтөбе облысы Мұғалжар ауданы Құдайберген Жұбанов атындағы ауылдық округінің әкімі Ләззат Бердібаева дала қызғалдақтарымен суретін жариялағаннан кейін жауапкершілікке тартылды.
Аймақтық полиция департаментіне сілтеме жасаған Informburo.kz хабарлауынша, шенеунік қызғалдақ шоғымен түскен суретті WhatsApp мессенджерінің статусына орналастырған.
Бердібаеваға қатысты әкімшілік хаттама жасалғаны, алайда бұл қызғалдақтарды жұлғаны үшін емес, кәмелетке толмаған баланы тәрбиелеу жөніндегі міндеттерін орындамағаны үшін екені атап өтіледі. Бұған дейін шенеунік гүлдерді оның балалары жұлғанын мәлімдеген еді.
Ұсынылған баптың санкциясы 10 АЕК (39 320 теңге) мөлшерінде айыппұл көздейді.
«Аудан әкімдігіне мемлекеттік қызметшінің этика кеңесінде қарау үшін ұсыныс жолданды», – деп қосты ведомстводан.
Еске сала кетейік, бұған дейін Ақтөбе облысында қолында дала қызғалдақтарын ұстаған ауылдық округ әкімі Ләззат Бердібаеваның суретінің жариялануына байланысты тексеру басталған еді. Сурет әлеуметтік желі қолданушыларының теріс реакциясын тудырып, олар гүлдерді жинаудың заңдылығына күмән келтіріп, шара қолдануды сұраған болатын.
Кейін Сенат депутаты Ольга Булавкина бұл оқиғаға түсініктеме берді. Ол экологиялық заңнамада табиғатты қорғау мен бұзушының ниетіне байланысты жауапкершілікті орынды саралау арасында тепе-теңдік табу қажеттігін мәлімдеді.