2022 жылдан бастап Қайрат Сатыбалдыдан және оның жақындарынан $1,6 млрд (732 млрд теңгеден астам) сомасында мүлік тәркіленді, оның ішінде $661,5 млн шетелден қайтарылды.
Антикордың мәліметінше, экс-президенттің жиеніне қатысты қылмыстық істер «Қазақтелеком» АҚ, «Көлік сервис орталығы» АҚ-дан аса ірі көлемдегі тонау, қылмыстық жолмен алынған ақшаны және өзге де мүлікті заңдастыру (жылыстату), сондай-ақ Сатыбалдыға бағынысты компанияның кедендік баждарды төлеуден жалтару фактілері бойынша тергелді.
Қайрат Сатыбалды мүліктің бір бөлігін жақын туыстарына, үлестес тұлғаларға және өзіне бағынысты компанияларға ресімдегені атап өтіледі. Тергеу барысында ол кінәсін толық мойындап, залалды толық көлемде өтеп, сондай-ақ қылмыстық құқық бұзушылықтарды тергеуге және қылмыстық жолмен алынған мүлікті ашуға жәрдемдесті.
Қайтарылған активтер қатарына әкімшілік ғимараттар, эксклюзивті асыл бұйымдар, люкс үйлер, пәтерлер мен автомобильдер, компаниялардағы акциялар мен қатысу үлестері, теміржол жолдары және шетелден қайтарылған ақша қаражаты кіретіні хабарланды.
Қайрат Сатыбалдыға қатысты қылмыстық істер бойынша сотқа дейінгі тергеу барысында қайтарылған активтердің жалпы сомасы 732,8 млрд теңгені құрайды. Олардың ішінде:
- «Қазақтелеком» АҚ акцияларының 28,8% - 93,8 млрд теңге
- «КСО» АҚ - 30,2 млрд теңге
- Төрт компаниядағы қатысу үлестері - 10,3 млрд теңге
- Қазақстандағы мүліктік активтер - 158,5 млрд теңге
- Эксклюзивті асыл бұйымдар - 105,39 млрд теңге ($230 млн)
- Қазақстандық шоттардағы ақша - 36,8 млрд теңге
- Аустриядан келген ақша - 36,8 млрд теңге ($82,1 млн)
- Лихтенштейннен келген ақша - 116,7 млрд теңге ($260,5 млн)
- БАӘ-ден келген ақша - 6,3 млрд теңге ($14 млн)
- Түркиядан келген ақша - 2,2 млрд теңге ($4,92 млн)
- Бағалы қағаздарды сату - 135,8 млрд теңге ($300 млн)
«Құны 158 млрд теңгеден асатын 115 қазақстандық объект мемлекет меншігіне берілді, оның ішінде 73 жылжымайтын мүлік объектісі (13 үй, 10 ғимарат, 13 жер телімі, 4 пәтер, 3 құрылыс, 2 қосымша ғимараты бар медресе ғимараты, 2 тұрақ орны, 25 үй-жай, 1 аяқталмаған құрылыс объектісі), 37 жылжымалы мүлік объектісі (29 автокөлік, 5 бірлік арнайы техника, 3 квадроцикл) және өзге де мүлік», - деп хабарлады Антикорда.
Астана мен Алматыдағы мемлекетке берілген әкімшілік ғимараттардың жалпы ауданы 180 мың м²-ден асатыны хабарланды. Люкс объектілерінің бірі, атап айтқанда Сатыбалдының Ақмола облысы Барап ауылындағы жалпы ауданы 1,5 мың м² және жер телімінің ауданы 135 га болатын бұрынғы резиденциясы Астана қаласы білім басқармасына берілді.