2026 жылғы 13 қазанда Ресейдің Пенза облысындағы «Орталық Азия — Орталық» газ құбырында жарылыс болып, одан кейін алаумен жану басталды. Апат Орталық Азиядан, оның ішінде Қазақстаннан газ тасымалдауға байланысты магистральда болды.
НЕ БОЛДЫ
Аймақтық төтенше жағдайлар министрлігі (ТЖМ) басқармасының мәліметінше, апат туралы хабарлама 13 қазанда Мәскеу уақытымен 11:00-де түсті. Жоғары қысымды жерасты газ құбырының үзілуі Пенза облысының Белинский ауданындағы Волчково ауылының маңында болды.
Құбыр зақымдалғаннан кейін алаумен жану басталды: жалынның биіктігі 70 метрге жетті. Өрт жанындағы өсімдіктерді де шарпыды.
АПАТТЫҢ САЛДАРЫ ҚАЛАЙ ЖОЙЫЛУДА
Газ құбырының апатты учаскесі жабылды. Салдарды жоюға 34 адам мен 12 техника бірлігі тартылды, оның ішінде өрт-құтқару бөлімшелері, полиция, медицина қызметкерлері, апаттық газ қызметтері және энергетикалық желілер мамандары.
Алдын ала деректер бойынша қаза тапқандар мен зардап шеккендер жоқ.
ГАЗ ҚҰБЫРЫ ТУРАЛЫ НЕ БЕЛГІЛІ
«Орталық Азия — Орталық» – Түрікменстан, Өзбекстан және Қазақстанның газ кен орындарын Ресеймен байланыстыратын көп желілі магистральдық газ құбырлары жүйесі. Жүйенің ұзындығы шамамен 5 мың км.
Магистраль аймақ елдері арасында газ тасымалдау үшін құрылған. Ол төрт мемлекеттің аумағы арқылы өтеді және халықаралық газ тасымалдау инфрақұрылымының бір бөлігі болып табылады.
ЖАРЫЛЫС СЕБЕПТЕРІ ТУРАЛЫ НЕ БЕЛГІЛІ
Деректер жарияланған сәтте жарылыс себептері туралы мәлімет жоқ. Сондай-ақ осы оқиғаға байланысты Қазақстанның газ тасымалдау жүйесінің жұмысындағы бұзушылықтар туралы расталған ақпарат жоқ.
